Cinîya bi nameyê S.K ya ke par zewejîyaye û bi no hawa mêrdeyê xo reyde Bedlîs de bica bîyî. S.K seba ke mêrdeyê xo ra şîdet vînayêne xo muracatê Mudirîya Asayîşî ya Norşînî kerde.
Polîsan îstîxbarat girewt ke S.K zaf reyan şîya partîyê HDP û DBPyî. Goreyê îdîayan polîsan S.Kye rê ajantî pêşnîyaz kerdo û aye rê wina vatî: “Eke ti derheqê HDP û DBPîyan de zanayîş bida ma, ma do to bikerî binê pawitişê dewlete û ma do to mêrdeyê to ra bifeletnî.”
Goreyê îdîayan badê pêşnîyazê polîsan S.Kye derheqê HDP û DBPyî de zanayîş daya polîsan, dima ra zî seba pêserkerdişê xeberan serbest ameya veradayîş.
S.Kye derheqê mêrdeyê xo û zaf kesan de zanayîş daya polîsan. Badê îfadeyê S.Kye hemşaredarê Norşînî M. Emîn Ozkan, Sureya Ata, Nazîme Avras, Hemserekê Şaredarîyê Bedlîsî Nevîn Daşdemîr, Huseyîn Olan û bi desan kesî ameyî tewqîfkerdiş. Goreyê îfadeyê S.Kye ke vato, ‘mi bi çimanê xo dî ke pere dayî rêxistine’ hemşaredarî tewqîfkerde yî. Avûkatê ke ewnîyenî dosya zî wina vanî: “Seba îfadegirewtişî xeber nêdayî ma. Ma nêzanî ke îfadeyê na cinî senî ameyo girewtiş. Seba ke dosye de qeraro nimiteyî esto, ma nêzanê ke mîyanê dosya de çi ca gêno. Îfadeyê merdimêko winasî do çend raşt bibo. Eke qerarê nimiteyî dosya ser ra bêro wedarnayîş ma do zanayîş bidî raya pêroyî.”
ANF / BEDLÎS