Roje çin a ke welatê Ewropa ser kurd û dezgeyanê kurdan zextan nêkerî. Wina bîyo ke bitaybetî tayê welatê Ewropa no het de dewleta tirkî ra kêmêr nêmanenî. Nînan ra yewe zî Almanya ya. Vizêr seatanê serê sibayî de polîsanê Almanya eştî Merkezê Komelê Kurdê Demokratîke (DKTM) ser.
Bi desan polîsî beşdarê ser eştişî bîyî. Ame musayene ke polîsan beyraqe û fotografê ‘qedexe’ sey mehne nîşan dayî û eştî. Sereştiş nizdîyê 4 saetan dewam kerd û netîceyê ci de dest ronîya xeylê fotograf, beyraqe û wêneyan ser. DKTMyê Bîefeldî îzehetêk da û sereştişî şermizar kerd. DKTMyî wina va: “No kerdişêko antî demokratîke û bêhuqûqî yo. Ma nê kerdişê polîsan şermizar kenî.”
Nika ra ver zî polîsanê Almanya 13ê Hezîrane de eştbî komeleya NAV-DEM û Civaka Azadî ser û seba nê sereştişî zî çalakîya ke pê nêameybî nîşan daybî. Polîsê Almanya bi serran o dezge û fealîyetanê kurdan hedef gênî. Qedexe êdî tena bi beyraqe, înternet û çalakîyan sînordar nîyo, kitab û eserê muzîkî zî hedef de yî. Aşma Adare de polîsan eştbî Weşanxaneyê Mezopotamya û Mîr Multîmedîa ser û sehnayîşî viraştbî. Netîceyê sereştişan de dest ronîyabî ser bi hezaran kitab, CD û deyîran ser. Kitabê ke dest ronîyayî ser mîyan de ferhengê Kurdî-Almanî û kitabê perwerdeyî yê domanan zî estbî.
ANF/BÎELEFELD