Karkerê zîretî ke 18ê Gulane seba xebetîyayîşî Pirsûs ra şîyêne Dîlok, nuqtaya kontrolî ya polîsan de raştê gulevarnayîşê polîsan ameybî. Hedîse ver 6 karkerî birîndar bîbî. Karkerê ke mîyanê wesayîtî de bî, babete ser o qisey kerdî.
Şofêrê wesayîtî Numan Tatliyî va ‘ma nuqtaya kontrolî de vindetî’ û wina domna: “Badê ke ma vindetî polîsan va ‘wesayît ra pêya bibê’ û gule wesayît ser o varnayî. Herçiqas ke ma înan ra va ‘ma karkerê zîretî yî’ labelê reyna zî ma ser o gule varnayî. Birîndarê ma estbî, mi veng da ambûlanse labelê polîsan destûr nêda ke ambûlanse bêro. Polîsan destûr nêdayêne ke birîndarî bêrî tedawîkerdene. Wexto ke îfadeyê ma ame girewtene, polîsêk embazanê ma tehîd kerd û va ‘eke şima gerrekar bibî, do şofêrê şima bêro tepiştene’. Labelê karkerî dima ra bîyî gerrekar.”
Karkeran ra Emîne Çalişane wina va: “Polîsan vatêne ‘şehîdê ma estî, cok ra ma hêrsbîyaye yî’ û heqaretê ma kerdêne. Eke ez ewja de bimerdêne, gelo do dewlete wayîr bivejîyayêne? Nika ez linga xo ra birîndar bîya, ti kes halê mi pers nêkeno. Ez do gerreyê înan bikera.”
15 polîsî gule reşanayî
Mêrdeyê Emîne Ahmet Çalişanî zî va ‘wexto ke ez ameya nêweşxane, mi dî ke leşkeran îfadeyê cinîya mi girewtêne’ û wina domna: “Polîso ke ewja de bi, vatêne ‘qusûr meewnê, psîkolojîyê polîsêkî xira bîyo, cok ra wina kerdo’ . Mi zî reaksîyon nîşan da. 15 polîsî rêz bîyî û gule wesayîtî ser o varnayî. Ma do pey ci vera nêdî.”
MA / RIHA