FETHÎ BALAMAN / MA / COLEMÊRG
Hemserekê Şaredarîya Şemzînanî Seferî Yilmazo ke kanûna 2016î de amebî tewqîf kerdene, qala prosesê tewqîfbîyayîşê xo kerd.
Yilmazî va ‘ez roniştişê 7. yê doze de serbest ameya veradayene, labelê bombekerdişê Kitabxaneyê Umutî ra dima vera mi de konseptêkî estbi’ û wina domna: “Herçiqas ke Şemzînan de xoserîye nêameybî îlan kerdene zî, ma tewqîf bîyî. Tewqîfbîyayîşê mi de şîrikîya Ergenekon û AKPyî estbî. Xora senî şîrikîya înan dest pêkerd, ez ameya tewqîf kerdene. Xora ez verê cû 16 serrî zîndan de mendbîya.”
Yilmazî va ‘ez 22 aşmî yo ke yena mehkeme kerdene û ti delîl orte de çin o’ û wina dewam kerd: “Pêkaykerdoxê ke ma prosesê Kobanê de bi destûrê qeymeqamîye arê kerdbî ra bigîre heta çîyê bînî suc hesibîyayî. Badê ke ez tewqîf bîya, wexto ke polîsan ez berda zîndan, rayîr de wesayît 2 reyî vindarnayî û gule reşanayî hewa. Bi no hawa nîşan dayî ke ê eşkenî mi bikişî. Reyna zîndan de neheqîyî dewam kenî. Destûr nêdîyeno ti aktîvîteyanê sosyalî. Hema vaje ma her roje raştê neheqîyan ameyêne. Vernîya ma de weçînayîşê herêmî esto û şar do cewabêko gird bido nê xespkaran. Yê ke wazenî bi tepiştiş û tewqîfbîyayîşan şarî bitersnî ra şar do hesab biperso. Ma do tepîya game nêerzî û têkoşînê xo bidomnî.”