Çalakîya grevê vêşanî ya Nurîye Gulmene û Semîh Ozakçayî roja 211. de dewam kena. Çalakgeran ra Nurîye Gulmene nika Nêweşxaneyê Numune yê Anqara de yena tepiştiş û Semîh Ozakça zî Nêweşxaneyê Zîndanê Sîncanî de yeno vindarnayîş.
Heto bîn ra çalakîya ke seba piştîdayîşê Gulmene û Ozakçayî yena viraştiş, roja 331. de ya. Çalakgerî her roje Caddeyê Yukselî de çalakîya ‘ma karê xo tepîya wazenî’ virazenî. Sey her roje çalakgerî reyna waştî Abîdeya Heqê Merdiman ver de îzehet bidî û cok ra Ziqaqê Konurî de ameyî têhet.
Labelê polîsan destûr nêda ke çalakgerî îzehet bidî çapemenîye û mudaxaleyê çalakgeran kerdî. Polîsan pankartê çalakgeran yê ke ser de ‘Wa Nurîye û Semîh serbest bêrî veradayîş’ nuştêne dirnayî. Netîceyê mudaxaleyê polîsan de kesê bi nameyê Îlker Işik, Sîmge Aybars û yewna keso ke nameyê ci nêame musayîş tepiştî. Heto bîn ra ame musayîş ke 4 avûkatê bi nameyê Sebahat Gençtarîh, Alî Bozan, Emrullah Şam ve Onur Kale ke Mêrsîn de ameybî tepiştiş, grevê vêşanî dayî destpêkerdiş û heta ke bivejyî mehkeme do grevê xo bidomnî.
MA/ANQARA