Taxê Alîpaşa û Lalebeyî yê qezaya Sûrî ya Amedî de her çiqas ke şar reaksîyon nîşan dano zî rijnayîşê taxan dewam keno. Merdimî bi hawayo zorî keyeyanê xo ra yenî vetiş.
Na çarçewa de 2 rojî verê Keyeyê Tazîyeyî yê Alîpaşa zî bi zorê zabita û polîsan ame rijnayîş û vizêr zî Ziqaqê Kutlu hetê polîsan ra girîya binê abluqa. Zaf hûmare de wesayîtê zirxinî, TOMA, polîsî û ekîbê rijnayîşî ziqaq de kom bîyî.
Polîs û ekîbê rijnayîşî waştî keyeyo ke aydê cinîya bi nameyê Ayşe Dune bî, birijnî. Dune vera rijnayîşî de reaksîyon nîşan daye. Labelê ekîbê rijnayîşî destûr nêda ke eşyayî daxî keyeyî ra bêrî vetiş û keyeyî rijna. Wexto ke Ayşe Dune û lajê aye Sadik Dun vera rijnayîşî de vejîyayî, raştê hêrişê polîsan ameyî û ameyî derbkerdiş. Dima ra taxijî reaksîyon nîşan dayî û polîsan seba vilakerdişê şarî ver bi hewa gule reşanayî. Sadik Dun, Okan Barutçuoglu û keso ke nameyê nêame zanayîş hetê polîsan ra ameyî tepiştiş. Nêame musayîş ke kesê ke ameyî tepiştiş, berdî kura û abluqaya polîsan dewam kena.
Heto bîn ra Platformê Rijnayîşê Sûrî rê Nê û Parlamenterê HDPyî zî ameyî Taxa Alîpaşa. Taxe de krîz dewam keno û rojnamegerî cayê hedîseyî ra ameyî dûrîkerdiş.
ANF/AMED