Vejîya orte ke polîsan seba ke şîyîş û ameyîşê wendekaranê lîseyî yê partîya HDP û DBPyî asteng bikerî, keyeyanê wendekaran ser ra zext û teda kerdî. Merkezê Çewlig de polîsan seba ke vernîya şîyîş û ameyîşê wendekaran yê partîya HDP û DBPyî bigîrî û seba tersnayîşî, wendekaran tacîz kenî. Polîsî bi rayîrê keyeyan zext û tedayan ser wendekaran de kenî. Seba nêyî zî bi wesayîtanê sîvîlan, wendekaran taqîp kenî, wêneyê înan ancenî û bi no hawa bi taybetî wendekaran ser de tedaya psîkolojîk virazenî.
Bi taybetî wendekarê ke lîse de wanenî, rastê nê zext û tedayan yenî. Semedo ke polîsan nê zext û tedayan ra netîce nêgirewto, nika zî keyeyanê wendekaran bi telefon gêrenî û tayînan veng danî mudurîya asayîşî û ewja de tehdît kenî.
Wazenî çimê wendekaran bitersnî
Goreyo ke ame musayîş, polîsî keyeyanê wendekaran bi telefon gêrenî û înan ra vanî ‘Domanê şima beşdarê çalakîyanê îlegalan benî, domananê xo rê wayîr bivejîyê. Eke şima wayîr nêvejyî, do şêrî koyan. Destûr mederê ke wa domanê şima şêrî partîyê HDP û DBPyî. Destê ma de delîlî estî û ma şima hişyar kenî. Eke şima mekerê, ma do bikerî.’
Polîsê ke partîyê DBP û HDPyî bi hawayo îlegal nîşan danî, wazenî bi keyeyan ser ra wendekaran bitersnî.
ÇEWLÎG