Tirkîyaye 5’ê kanûne de lejkerê xo yê taybet û çend maşîneyê şerî eşrawitî Mûsil û heta nika hetê îqtîdarî ra zî derheqê sebebê eşrawitişê lejkeran sero ti zanayîşekî zelal nêameyo aşkerekerdiş. Babete sero Wekîlê HDPe ya Amedî Îdrîs Baluken vînayîşê xo ardî ziwan.
Tirkiye binkewtişê xo niminena
Balûken ard ziwan ke polîtîkayê AKP yê Rojhelatê Mîyanî îflas kerdî û wina dewam kerd: “Polîtîkayê Tirkîye yê mezhebî û doştê kurdan, Tirkîye dekerdo mîyanê rewşeke tengî. Tirkîye ravêreyeye ke Sûrîye û Rojawanî ser o gelek çî yeno nîqaşkerdişî de bi eşrawitişê lejkerana Mûsilî wazena îspat bikero ke bi xo zî herem de sey qûwet estê. Tirkîye ser Mûsil û Kerkukî hesabê ci yê verê ra estê. Tirkîye wazena yew hetî ra binkewtiş-têkşiyayişê xo yê Sûrîye binimno, heto bîn ra zî wazena mesajê ‘mi hîna hesabê xo yê Mûsil û Kerkukî ra fek veranêdayo’ bido.”
Wazenê Kurdan bifetisnê
Parlamenterê HDP Îdrîs Balukenî dîyar kerd ke Tirkîye bi na hemle wazena Hereketê Serbestî yê Kurd ke Rojawan, Sûrîye û pêroyî Rojhelatê Mîyanî de meşru bena bifetisno. Balukenî va: “PKK demê peynî de Vaşûrê Kurdistanî de tesîrekê gird kerd û qiseyê xo wina ramit: “Tirkîye zî bi na hemle wazena hem mesaj bido şarê Vaşûrî û hem zî bido PKK. Zey ke yeno zanayîş Tirkîye her roj hêrişê Qendîlî kena. Semedê ke nêşkena bi operasyonê hewaye encamekî bigîro, wazena PKK û şarê Vaşûrî ra vajo ‘ez eşkena bi erdî ra zî operasyonan biviraza’.
Tirkiye û PDK jûyê
Balukenî hayr ant nêrazîbiyenê ke çar parçeyê Kurdistanî de yenî dayiş ser û wina vat: “Çar-çehar parçeyê Kurdistanî de verra-dijî Tirkîye hêrs-bertekê zaf girdî estî. Tirkîye bi nê hewldayîşan wazena xo nêzdîyê PDK damusno û bi no hawa nêverdo ke, qirkerdişê ke kerdî bikewo rojdemê kurdan. Nika Sûr û Nisêbîn de qirkerdişê zaf giran ê sivîlan yeno kerdiş. Hetê nêy qirkerdişan de cayê dîrokî yê kurdan raştê hêrişan yeno. Tirkîyi wazena wina damusno ke PDK reyde pêameya û bi no hawa zî hêrsan kemî bikero.”
Wekîlê Koma HDP û Parlamenterê Amedî Îdrîs Balukenî ard zon ke, bi nê polîtîkayan Tirkîye û şarê Tirkîye ameyî ver herbê do gird û wina peynî kerd: “Bi vistişê teyara Rûsî qrîzekî gird viraşt û bi no hawa Tirkîye şarê xo kerd muxatabê şerî. Bade îflaskerdişê polîtîkayê Sûrîye hêzê mîyannetewî qebul kerdî ke ravêreye ke xilaskerdişê Cerablûsî bidî dest pê kerdiş, Tirkîya dekewta rewşeke wina ke tay mendo heme îdiayê xo vinî bikero.”
ANF/RIHA
DAIŞ petrolî roşena tirkîye
Bado ke tirkîye teyareya Rusya vist, Rusya zî îdia kerd ke tirkîye petrolê DAIŞ herînena. Hemverê na îdia Rûsya, tirkîye nêrazîbiyenî damusnabi. Sekreterê Perwerde û Rayvistbiyişî yê Sendîkaya Petrol-Îşe Mustafa Tekîk derheqê babet de vînayîşê xo ard ziwan.
Endî rastî nîna nimiten
Tekîk hayr-bal ant rotişê petrolê DAIŞ yê Tirkîye ser û wina vat: “DAIŞ cayo ke serwerîya ci esta ra petrol vejena û roşena Tirkîye. Endî her kes zano û na raştî nîna nimitiş. La çi heyf ke, destê ma de zanayîşe zelal yê ser ameyîşê petrolê TUPRAŞ yê Êlihî çîno. Petrolo ke yeno Tirkîye, tîya de yeno hedrekerdiş û dima zî yeno rotiş. Mi zaf reynî-carî eşnawito ke DAIŞ Mersîn, Dîlok, Ceyhan û Îskenderûn de, no karî bi profesyonel kena. DAIŞ no bi rayîrê komîsyonan kena.”
150 varîl yeno
Tekîk’î qalîkerdişê xo de vat ke îzehatê Rûsya raştiyan ano ziwan û wina vat: “Petrolê ke bîrê çeteyanê DAIŞ ra yeno vetiş, bi vaya nîme Tirkîye rê yeno rotiş. No 25 serrî ke ez no karî kena, goreyê texmînê mi rojeke de 150 varîl petrol yeno herînayîş. Nika varîlekî petrolî 40-45 dolarî reyde yeno rotiş, petrolê ke Tirkîye ra yeno rotiş 20-25 dolarî reyde yeno rotiş. Tekîk’î peynî de hayr ant petrolê Kurdistan ser û va: “Ma wazenî petrolo ke Vakûrê Kurdistanî de vejyeno şarê heremî ra vila bibo.”
ANF/ÊLIH