Wexto ke Parlamenterê Riha û Wezîrê Heywan û Zîretî Faruk Çelîkî ameybî gure ser, vatbî ‘ma do goşt erzan bikerî’. Esnafê qezaya Eyyubîye ya Riha dîyar kerdî ke dewlete herinda ke piştî bida esnafan û berardişî zêde bikera, bi îthalatî probleman hîna kûr kena.
Babete ser o esnafan ra Fethî Yaygin (47), Abdulhalîm Yavuz, Huseyîn Şanlî (60) û Serekê Komeleya Bazarê Heywan û Gandaran ya Riha Îzzet Çîftçîyî qisey kerdî.
Ê qezenc kenê
Yayginî qiseykerdişê xo de va ‘sebebê vayîyê goştî, vayîyê simerî ra yo’ û wina dewam kerd: “Karê miqatekerdişê heywanan bi polîtîkayê îthalatî qedîya. Şerê sînorî ver tîcaret vindeto. No şer tesîrê xo ma ser de kerd. Şîrketê pîlî kîloyê goştî 15-16 TLyî ra herînenî û bi 50-60TLyî ra roşenî.”Yavuzî wina va: “Heywanî çiqas destê ma de bimanî hende zirar o. Wexto ke yenê rotiş zî bi erzanî yenê rotiş. Dewlete piştî nêdana ma, dana şîrketanê pîlan.”
Ez nêeşkena bigîra
Şanliyo ke seba herînayîşê goştî ame sûke û destveng agêra, wina va: “Kîloyê goştî 40 TL yo. Ez bi maaşê asgarî xebetîyena û nêeşkena heywanêk şenik daxî biherîna.”Çîftçîyî zî wina va: “Par kîloyê heywanêko gandar 10-11 TLyî bî, la emser 15-16 TL yo. Qesabî zî 40 TLyî ra roşenê. Sebebê nînan dewlet a. Çimkî dewlete piştî nêdana. Çelîk pîyasa ra bêxeber o.”
DÎHABER/RIHA