Qirkerdişê xozayî ke bi koyê Cudî dest pê kerdbi, qezayanê Amedî de dom kenîy. Qezayêy Licê, Pasûr û Karaz de no çend rojîyo ke veşayîşê daristanan domyeno û şar semeda ke nêy veşayîşan bimirêno derfetanê xo reyde xebityeno. Walîtîya Amedî zî bi mehneya asayîşî maşîneyê adirmirênayîşî nêerşawino cayê veşayîşî û hemverê şarê ke wazeno bi derfetanê xo reyde şêro cayê veşayîşî ver zî astengî veceno. Derheqê no babetî de Hemsereka Şaristanî Hafîzê Îpek qalî kerd û vat ke nêyî polîtîkayê qirkerdişê şarê kurdan ê.
Wazenîy qir bikerîy
Îpek ard ziwan ke seyî qezayêy Licê, Pasûr, Cudî û sewbîna cayan de qirkerdişê xozayî yeno viraştiş û wina vat: “Weyra de sencîya xozayî yeno xirakerdiş û ganîyê ke tede cuyenîy yenîy qirkerdiş. No polîtîkayek sîyasî ya dewletî yo. Yeno manaya ke dewlet konsepta topyekun îmhakerdiş dekerdo dewre. Wazenîy ke her hetî ra qirkerdiş bivirazîy. Operasyonêy sîyasî, bombevarnayîşê ser Raşteyê Pawitişî ya Medyayî, wêyekerdişê çeteyanê DAIŞî û veşnayîşê daristanan yeno manaya ke şerê topyekun ameyo îlankerdiş.
Semeda ke adir hîna gurrêr nêbo şarê ma çi destê înan ra yeno kenîy. Şaredarîyêy ma bi kedeko gird hewl danîy ke veşayîşî bimirênîy. La dewlet ne mirêneno û ne zî verdano ke ma bimirênîy.”
Tîmêy bi zerrî
Îpek ard ziwan ke erdnîgarîya ke ma tede cuyenîy de zaf kesan cuyayîşê xo vindî kerdîy û wina vat: “Wextê vindarnayîşê şerî vîyareno. Na semed ra lazim o ma xoverdayîşê xo yê demokratîkî şarê xo reyde aver bîşerî û şerî bidîy vindarnayîş. Heta ke konsepta şerî dom bikero do AKP û hetgirê înan vindî bikerîy. No hal seyî tuwerzînê ke înan lingê xo bidîy maneno.”