ROJ HOZAN / JINNEWS / SILÊMANÎ
Dewleta Tirkî bi rojan o ke hêrişê Başûrê Kurdîstanî kena û heta nika xeylê sîvîlî ameyî qetilkerdene û hende zî birîndar bîyî. Endama Heyetê Îdareyê Tevgerê Azadîye Ronak Mecîde babete ser o qisey kerde û hişyarîyê muhîmî kerdî.
Ronake va ‘nika Kurdîstan û Rojhelato Mîyanên prosesêko sîyasî ra derbas benî’ û wina dewam kerde: “Çar parçeyê Kurdîstanî de dagîrkerîye esta. Şarê Başûrî heta nika xo dagîrkeran ra pawito û bedelê giranî dayî. Labelê ewro hukmatê Başûrî de halê telîmîyetî esto. Ewro Başûr de her partî hewl dana xo nizdîyê tayê dewletanê teberî bikero. Cok ra Tirkîya zî dagîrkerîya xo meşrû vînena. Çimkî ma dî ke Tirkîya mîyanê herra Başûrî de qerargeh viraşto û ti kesî vengê xo nêkerd.”
Ronake dewamê qiseykerdişê xo de bale ante têkilîyanê PDK û Tirkîya ser û wina va: “Tirkîya serra 1992î ra dima hewl dana qerargehanê xo bizêdna û heta nika 52 qerargehî awan kerdî. Demo peyên de hêrişê Tirkîya zêde bîyî. Hêzê pêşmergeyî hêrişanê Tirkîya rê rayberîye kenî. Tirkîya hewl dana kulturê Başûrî çin bikera û herinda ci de kulturê xo awan bikero. Na polîtîka raşteraşt hetê Erdoganî ra yena îdarekerdene. Tirkîya statuyê Kurdan qebul nêkena.”
Eke yewîye bibo, problemî çareser benî
Ronake peynîye de qala çareserîya probleman kerde û wina va: “Verê cû mîyanê Kurdan de îttîfaq û yewîye estbî. Cok ra Kurdî hertim raştê hêrişan ameyî. Badê ke Dewleta Osmanîyan xirabe bîye, Kurdî bi Peymana Lozanî bîyî çar parçe. Ya, ewro mabênê ma de nakokîyî estî, labelê lazimîya ma bi yewîye esta. Ganî ma yewîya xo awan bikerî. Eke yewîye bibo, heme problemî çareser benî.”