SEYÎT EVRAN / ANF/QAMIŞLO
Şorişê Rojawanî serra 2012î ra nata game bi game erzîyeno dewre. Tewr peynî 22ê Êlule de Vakurê Sûrîye de weçînayîşê komunan ame kerdiş û weçînayîş bi hawayo serkewte derbaz bî.
Babete ser o Hemsereka Meclîsê Sûrîyeya Demokratîke (MSD) Îlham Ehmede qisey kerde. Ehmede dîyar kerde ke ê hewl danî ke netîceyê weçînayîşê komunan bierzî pratîk û wina va: “Ma weçînayîş ra dima nika hewl danî ke Qanûno Bingeyî yê Sûrîye yo Demokratîke amade bikerî. Cok ra eleqeyo ke weçînayîşan rê ame nawitiş ver, ma kêfweş î.”
Îlham Ehmede va ‘beşdarbîyayîşê weçînayîşan se ra 70 bî’ û wina domnaye: “Sûrîye de reya sifteyîne bîye ke şar bi îradeya xo weçînayîş viraşt. Şarê Vakûrê Sûrîye projeyê ma sey çareserî dîyî. Tarîxê Sûrîye de reya sifteyîne ya ke weçînayîşêko demokratîke virazîya. Heme çî hetê şarî ra ame dîyarkerdiş. Sey nimûne rejîm tewr zaf şarê erebî tehdît kerdbî, labelê eleqeyo tewr gird hetê ereban ra ame nîşan dayîş.
Hêzê mîyanneteweyî çîyêko negatîf nêvatî
Îlham Ehmede va ‘Sûrîye de kaos bi hawayo xorî dewam keno û seba çareserîye bêxera ma projeyê ti kesî çin o’ wina dewam kerde: “Heta nika hetê hêzê mîyanneteweyîyan ra derheqê weçînayîşî de çîyêko negatîf nêameyo. Seba ke 7 serrî yo ke ma cuya ortax û seyewbînanî de israr kenî, şarê bînî eleqeyêko gird nîşan dayî. Ma pîya têkoşîn da, şer kerd û loqmeyê xo pare kerd.”