Qezaya Qoserî ya Mêrdînî de 21ê Teşrîna peyêna 2004î de Ugur Kaymazo 12 serreyî û pîyê ci Ahmet Kaymaz verê keyeyê xo de ameybî qetilkerdiş û sîlehê luledergî ronîyayî hetê înan û sey ‘terorîstê ke amadekarîya çalakîye kerdênê’ ameyî nîşandayîş. Hîna zî qatilê Ugur Kaymaz û pîyê ci nêameyî dîyayîş.
Hem qatilî nêameyî dîyayîş û hem zî keyeyê Kaymazî ser o zextî zî dewam kerdî. Dayîka Ugurî Makbula Kaymaze girêdayeyê Şaredarîya Qoserî de Keyeyê Destekî yê Perwerdeyî de sey pakkerdoxe xebetîyayêne. Dayîke serrgêra laj û mêrdeyê xo de bi KHKyî ameye îxraçkerdiş. Reyna ke heykelo ke ser nameyê Kaymazî de amebî viraştiş zî ame wedarnayîş û herinda ci de quleya saete ronîyaye.
Dayîke Makbule Kaymaze serrgêra 13. ya hedîseyî de qisey kerde. Dayîke vera nêdîyayîşê qatilan de reaksîyon nîşan daye û wina va: “Lajê mi se kerdbî? Qatilî hema zî teber de gêrenî. Ma wazenî wa aştîye bibo û wa domanê ma nêmirî. Qesebaya ma veşaye. Ez her roje înan yad kena. Ti kes heqê domanan nêperseno.”
Doze AYM de vindete ya
Seke yeno zanayîş hedîse ser o derheqê 4 polîsan de doze abîybî. Doze bi mehneya ewleyîye girîyaye Eskîşehîr. Ewja de derheqê polîsan de qerarê beraatî dîya. Labelê Mehkemeya Heqê Merdiman ya Ewropa (AÎHM) Tirkîya mehkum kerde û qerar daye ke Tirkîya 70 hezar madî û 70 hezar Euro manevî tazmînat bido keyeyî.
MA/ MÊRDÎN