2ê Temmuza 1993î de bajarê Sêwasî de Otelê Madimakî de 33 kesî ameybî veşnayîş û ewro serrgêra 25. ya Qetlîyamê Madimakî yo. Babete ser o Dîvanê Hemserekîya Kongreya Komelê Demokratîke ya Kurdistanî (KCDK-E), Kongreya Komelê Demokratîke (KCD) û Hemserekîya Konseyê Caardişî yê KCKyî îzehetê nuştekî dayî.
KCDK-Eye îzehetê xo de vato ‘ma serrgêra 25. ya Qetlîyamê Madimakî de yî’ û wina dewam kerdo: “No qetlîyam eynî sey Qetlîyamê Roboskê vîrê merdiman de cayê xo girewto. Ma nê zîhnîyetî Koçgirî, Dêrsim, Agirî, Zîlan, Çorum, Gurgum û Roboskê de şinasnenî. Dewlete seba ke zîhnîyetê tekperestîye bikera hakim, yan qetlîyaman virazena, yan zî dana viraştene.”
KCDK-Eye îzehetê xo de qala berpirsîyarîya nê qetlîyamî kerda û wina vato: “Sey heme qetlîyaman berpirsîyarê nê qetlîyamî zî dewlete yo. No qetlîyam operasyonê dewlete bi xo yo. Aye roje çi polîs û çi zî leşkerî qet mudaxaleyê hedîseyî nêkerdî. Herçiqas ke çeteyê sey yê DAIŞî qatil bibî zî, yê ke plan kerdo û eşto dewre dewlete bi xo ya. Xora Serekkomarê ê wextî Suleyman Demîrelî vatbi ‘ma nêwazenî elewî û kurdî bêrî têhet, cok ra ma kombîyayîşêk viraşt û tayê qerarî girewtî’. No vatiş zî heme çî bi hawayo zelal aşkere keno.”
Ganî ma têkoşînê xo berz bikerî
KCDK-Eye bale anto ser perskerdişê hesabê nê qetlîyamî ser û wina vato: “Seba hesabperskerdişî ganî ma têkoşînê hetanê cîyayan bikerî yew. Sere de kurd û elewîyî, ganî heme nasname û bawerîyê cîyayî têkoşînê xo bikerî yew û vera Erdogan û AKP-MHPyî de cepheyo ortax awan bikerî. No zîhnîyeto qatil 25 serrî ra dima eynî qetlîyam û kerdenan domneno. Ma do vîrardiş û têkoşînê înan bi hawayo qerardarî bidomnî û ma sozê nêyî danî. Ma yê ke emrê nê qetlîyamî dayî û nê qetlîyamî kerdî bi hawayo nefret şermizar kenî. Ma do heta ke nê zîhnîyetê qatilî ra hesab pers kenî, têkoşînê xo bidomnî.”
Ma do qet xo vîra nêkerî
Kongreya Komelê Demokratîke (KCD) zî babete ser o îzehetêko nuştekî daye. KCDyî vato ‘zîhnîyeto ke Qetlîyamê Sêwasî viraşto û çeteyê DAIŞî ke merdiman bi hawayo ganî veşnenî, mabênê înan de ti ferq çin o’ û wina domnayo: “Herçiqas ke 25 serrî qetlîyamî ser ro derbaz bîyî, labelê reyna zî têrîmendişêk nêbîyo. Ma Qetlîyamê Madimakî yewna rey şermizar kenî û ma do qet xo vîra nêkerî. Ma kesê ke Sêwas de merdî biminet yad kenî û ma do têkoşînê înan berz bikerî. Ma do vîrî nêkerî û nêdî vîrî kerdene.”
Qatilê Madimakî merdimê DAIŞî yî
Hemserekîya Konseyê Caardişî yê KCKyî zî dîyar kerda ke mabênê kesê ke merdiman Madimak de veşnayî û çeteyanê DAIŞî de merdimîye esta û wina vato: “Ma qatilan şermizar kenî û şehîdanê demokrasî biminetî yad kenî. Bi nê qetlîyamî hewl dayî elewîyan têkoşînê demokratîkbîyayîşê Tirkîya ra dûrî bikerî. Ewro çeteyê ke girêdayeyê AKP yî, qatilanê Madimakî ra hîna nîjadperest î. Cok ra Madimak nêqedîyayo û tehlukeyê winasî dewam kenî. Seba vîrardişê elewîyan ganî ma hîna zêde wayîrê têkoşînê înan bivejyî. Wa elewîyî hîna zêde têkoşîn bidî.”
MERKEZÊ XEBERAN