Çend rojî ver qaymeqamê qezaya Mexmurî Mihemed Rizgarî îdîa kerd ke Kampê Bextwaştoxan yê Şehîd Rustem Cudîyî (Mexmur) sey qerargahê leşkeran yeno xebetnayîş. Badê îdîayê Rizgarî, Endamê Meclîsê Şarê Demokratîke yê Mexmurî Hecî Kaçanî bi îzehetêk cewab da îzehetê qaymeqamî.
Kaçanî destpêka îzehetê xo de wina vato: “Kampê Şehîd Rustemî, bin kontrolê Miletê Yewbîyaye (MY) de yo. Hetê îdarî de zî girêdayeyê Herêma Kurdistano Federal de yo. Îzehetê qaymeqamî girêdayeyê sîyasetê AKP û PDKyî yo. Îzehetê winasî ma kenê hedefê dişmenan. Ma îzehetê winasîyan qebul nêkenî. Îdîaya ke vanî ‘bînayê ke girêdayeyê MY yî sey qerargahê leşkerî yenî xebetnayîş, zure ya.”
Wa bawer nêkerî
Kaçanî ard vîr ke wexto ke çeteyanê DAIŞî 2014 de hêrişê zaf cayanê Kurdistanî kerdbî, Hukmatê Başûrê Kurdistanî zî seba xelisnayîşê şarî gerîlayê HPGyî ra hetkarîye waştbî û wina va: “Mesut Barzanî bi xo seba zîyaretê gerîlayan ame kampê ma. Tîya de çîyê nimiteyî çinêbî. Eke ma ser de hêrişêk bibî, berpirsîyar qaymeqamê PDKyî yo. Heme kes zano ke kampê ma kampê bextwaştoxan o. Wa şarê Başûrî goş nêdo nê zuran.”
ANF / MEXMUR