Roja ke qayûmî tayînê şaredarîyanê DBPyî bîyî ra nata vera kultur û erjê kurdan de hêrişê qayûman nêqedîyenî. Tewr peynî seke yeno zanayîş qayûmî Sazgehê Zîretê Organîze yê Wanî (VOTAŞ) ke aydê Şaredarîya Bajarê Girdî ya Wanî bî, rotbî. Sazgeho ke 16 mîlyon TL ra amebî herînayîş, hetê qayûmî ra bi 19 mîlyon 510 ra ame rotiş.
Babete ser o Serekê VANÇEBÎ Cevdet Altindagî qisey kerd û vera na rewşe de reaksîyon nîşan da.
Altindagî va ‘rotişê sazgehêko winasî yo muhîm qet nîno qebulkerdiş’û wina dewam kerd: “Zîhnîyeto ke qanûnanê xo pelçiqneno û qayûm tayîn keno, do esla menfîetê şarî nêfikirîyo. Qayûmî tena VOTAŞî nê, heme ersayê ke aydê şaredarîye bî, rotî. No tesîs seba menfîetê şarê amebî herînayîş û zaf projeyê muhîmî ameybî amadekerdiş. Ma do çîyanê başan bikerdêne û dima ra dewrê şarî bikerdêne. Eke wina bibîyêne, do 15 hezar kesî tîya de bixebitîyayênê, la destûr nêdayî. Ez bawer kena ke do şar demêko kilm de reyna bibo wayîrê îradeya xo û xo bi xo qederê xo dîyar bikero.”
MA/WAN