Vejîya raşte ke qayûmo ke tayînê Şaredarîya Êlihî ameyo kerdene, şaredarî 240 mîlyon TL kerdo binê deyn
Wezîrê Karê Mîyanên 11ê êlula 2016î de bi Qerarnameyê Hukmê Qanûnî (KHK) hetkarê Walî Şevket Aksoyî sey qayûm tayînê Şaredarîya Êlihî kerd. Vejîya raşte ke qayûmo ke tayînê Şaredarîya Êlihî ameyo kerdene, mîyanê 2 serr û nêmî de şaredarî heta qirik kerdo mîyanê deynan û 240 mîlyon TL deynê şaredarî esto.
Badê ke weçînayîşê herêmî yê 31ê Adare de Hemşaredarê Partîya Demokratîke ya Şaran (HDP) Songul Korkmaz û Mehmet Demîr ser kewtî û şaredarî dewr girewtî, deynê qayûmî vejîya raşte. Vejîya raşte ke qayûmo ke tayînê Şaredarîya Êlihî ameyo kerdene, şaredarî 240 mîlyon TL kerdo binê deyn û nika pêro-pîya 307 mîlyon û 328 hezar û 305 TL deyrê şaredarî esto.
Ma do deynan teşhîr bikerî
Hemşaredarê Şaredarîya Êlihî Songul Korkmaz û Mehmet Demîrî ardî ziwan ke ê do deynan ser de cigêrayîşan bikerî û şarî rê yew bi yew îzeh bikerî û vatî: “Ma do deynan teşhîr bikerî û bizanî ke nê pere şîyî kamî ca. Wa kes nêkewo mîyanê şikan ke do mîyanê hende deynan de senî xizmet bêro dayene. Ma aqûbetê mal û milkê şaredarî de cigêrayîşan kenî. rojanê verênan de do rewşe zelal biba û ma do eşkera bikerî.”
ÊLIH