Fina sifteyîno min çiyê winayin kerd. Îmkan nêbi. Badê çend rojan min kewt min dest. Ezo enê nûstey Qendîl ra nûsena. Ez 20’ê temmuze de Bruksel ra vera cayanê azad kewta ray. 22’ê mengî de resaya cayanê azad. O şan ma çaya embazan şimit û ma nanê înan bara kerd. Şewa maya sifteyîn bi sohbet û silasnayinê embazana ravêrd.

***

Rojo bîn, wexto ke ma werîştê îşaretê rojê anormali estîbî. Hewna çend deqeybi ma werîştê anonsê tiyaranê keşfî ame. O saniye ra tepiya, embazan tedbîrî kerdî vêsî. Embazan ma xeberdar kerdî. Hinî ma jî mûsaymi senî hereket bikirê. Ma winî jî kerd. Embazan çi vat, ma goreyê ci hereket kerd.

***

Rojo bîn, hereketê tiyaranê keşfî heveyna bi vêşî. Şewra ra hetanî şan tiyareyê keşfî nêvindartî. Wexto ê geyrayê, ma jî cayo talde de vindartê û firsed nêdayê înan cayê ma bizanê. Vera nîmeyê şew, bi vengê tifînga biya aya. Eno anonsê întîşarî bi. Ma hema pozîsyonê întîşarî girot. Badê çend deqeyana vengê tiyaranê lejî ame. 

***

Vêşî derg mekirî. Badê 2-3 deqeyana vengê teqayinî ame û eynî wext de roşniyê bi berz. Tiyaranê lejî dest bi bomkerdin kerdbi. Nîmeyê şew ê 24’ê tîrmeh ra hetanî şanê 25’ê meng tiyareyê lej ê tirki veng nêvindartî. Xeylê cay bombe kerdî. 

***

3-4 cayê nezdiyê ma jî çend finî bombe kerdî. Wexto ki bombekerdin vindarti, ma şîmi cayê ke bombe biyê. Ma dî, wijay cayê sivîlanê. Tiyaranê lej ê tirk ancî cayê sivîlan hedef girotîbî. Bombeyê qazan û roketî eştîbî. Peyniyê êrîşî de adir kewtbi daristanî. Dar û birikana piya, heywanê ciya ciyay jî telef bîbî. O veşayişo ki vejiyabi 28’ê mengî de wexto ki min eno nûste nûsnayê jî dewam kerdê.

***

Jew cayo ke rayveranê tirk bombe kerdibi, dewa Enzê bî. Dewleta tirk wija zey qerargehê PKK mûsnayê. Ma şîmi wija û ma dî, wija jî cayê sivîlan biyê hedefî. Dewa Enzê de mezelê dew biyê hedefî. Bombeyan îsabetê mezelanê dew kerdo. Mezelî 300-400 metrey teverê dew de bî. Peyniyê bombevaranî de heveyê mezelî jî texrîb bîbî. Heveyê embazî şî jew cayo bînê bibi hedef. Wija jî cayê sivîlan bi û peyniyê bombevaranî de 9 xenzîrî telef bîbî.

***

Ma badê bombevaranî, bi rayveranê KCKî ra jî qisey kerd. Înan vat ke, Endamê Konseyê Lejkerîn ê HPGî Şervan Varto şehîd kewto û 3 gerilay û 4 sivîlî biyê dirbetinî. Ê gerilayanê dirbetinan ra jew bado sehîd kewt. Bado ma îmkan dî, televîzyonê tirk temaşe kerdî. Ma fina bîn biyê şahîdê zûranê rayveranê tirk. Çiyo ke înan vatê çiyê bîn bi û çiyê ma çimanê xoya dî, çiyê bîn bi. Bi vatena bîna ma Qendîl de jî, bî şahîdê zûrkerînê rayveranê dewleta tirk. 


Memed DREWŞ