Hêriş û dagîrkerîya dewleta tirkî ya vera Başûrê Kurdistanî de dewam kenî. Kesê ke herêma Qendîlî de cuyenî, vera dagîrkerîye de reaksîyon nîşan dayî. Welatîyan dîyar kerd ke Qendîl zerrîya Kurdistanî ya û ê do destûr nêdî dagîrkerîye. Domanê dewanê Qendîlî zî binê vengê bombeyan de kayanê xo domnenî.
Dewleta tirkî demêko derg o ke vera Başûrê Kurdistanî de hêriş û dagîrkerîya xo domneno. Şarê Balekayetî vera bêvengîya hukmatê Başûrî de reaksîyon nîşan da. Şarî dîyar kerd ke Qendîl zerrîya Kurdistanî yo û dagîrbîyayîşê Qendîlî, yeno manaya dagîrbîyayîşê zerrîya Kurdistanî.
Welatîyan ra Şukrela Ebubekîrî va ‘dewleta tirkî nika herêma Biradostî de warêko hîra dagîr kerdo’ û wina domna: “Her roje operasyonan virazenî û herême bombe kenî. Dewleta tirkî wazena Kurdistan dagîr bikera. Bêvengîya hukmatê Başûrî beno sebebê dagîrkerîya dewleta tirkî. Ganî heme kurdî vera dagîrkerîye de bivinderî.”
Saman Bapîrî dîyar kerd ke dewleta tirkî warê dagîrkerîye hîra keno û wina va: “Hukmatê Başûrî zî vera na dagîrkerîye de bêveng maneno. Dewleta tirk goreyê zerrba xo merdimanê ma qetil kena. Ganî destûr nêdîyo dagîrkerîye.
Wa vera dagîrkerîye de bivinderî
Hemîn Hesenî zî hêrişê dagîrkerîye yê dewleta tirkî lanet kerd û wina va: “Ez wazena heme hetê Kurdistanî bibî yewe û vera dagîrkerîye de bivinderî. Dewleta tirkî hertim erdanê ma bombe kena û sîvîlan qetil kena. Şar mecbûr maneno koç bikero.”
Ma do destûr nêdî dagîrkeran
Dewleta tirkî vera Qendîlî de bombevarnayîşî domneno û dewê ke mintiqaya bombekerdişîd e manenî, cuya xo domnenî. Heto bîn ra dewanê Qendîlî ra Sînemokan de dewijî vera hêriş û dagîrkerîya dewleta tirkî de dewê xo nêteriknenî û cuya xo ya normale domnenî. Dewijî vera tehlukeyê bombekerdişî de qala muhîmîya girêdayîyay erdî kenî.
Dewijan ra yewe asmênan ra ewnîyeno û dîyar keno ‘teyarayê şerî ya dewleta tirkî nika zî herême de gêrenî’û wina domneno: “Dîyar nîyo do kura bombe bikerî. Seba ma mabênê gerîla û şarî de ti ferq çin o. Heta nika dagîrkeran bin nameyê hêrişê gerîla kerdişî de bi seyan sîvîlî şehîd kerdî. Ma do erdê xo nêteriknî û vera dagîrkeran de têkoşîn bidî. Dişmeno dagîrker hewl dano welatê ma dagîr bikero. Labelê ma do destûr nêdî.”
Domanê dewe binê vengê bombeyan de kayan kay kenî. Domanê bi nameyê Yara, Mihemed, Nujîne û Helîne ke emrê înan mabênê 4 û 15 serreyî de bedilîyeno, dîyar kenî ke ê do se beno wa bibo, dewa xo de bimanî.
MERKEZÊ XEBERAN