GOKHAN ALTAY / MA / ŞIRNEX
Bi nameyê Petrus Karatayo 63 serrî ke keldanî yo, serranê 80î de mecbûr mendbi ke dewa Herbolî ya qezaya Silopî ya Şirnexî ra koç bikero. Karatay çend aşmî verê agêrayo dewa xo. Karatay tena nêagerayo dewa xo, eynî wext de mezelê suryanîyan ke xirab bibî raşt kerdî, bi hezaran leyekê meyweyî ronayî û hingdarîye keno.
Karatay babete ser o vano ‘ma hewl danî dewêka ke herême de biba nimune, awan bikerî’ û wina domneno: “Ma heta nika 5 banî viraştî. Înşaatî nika vindetî. Labelê ma dewa xo bêwayîr nêverdanî. Ronayîşê leyekan dewam keno. Ma leyekan cayanê berzan de awan kenî. Beno ke ameyoxe de deştan de dewijî banan virazî. Heta nika şewatan ver keda ma veng ra şîye. Labelê ma reyna zî xebatanê xo domnenî. Ma do dewa xo bikerî keşke. Nika problemê ma yê cereyanî esto.”
Karatay vano ‘awankerdişê cuyêka newe seba mi çîyêko zaf weş o’ û wina dewam keno: “Eke cayêk de tîje, awe û herre bibo, ewja de merdim eşkeno debara xo bikero. Eke nêşênbo debara xo bikero, o wext sucdar o bi xo yo.”