Temsîlkarê Nor Zartonkî Murad Mihçiyî derheqê referandûmî de qisey kerd û seba çi do vajo nê vînayîşê xo ard ziwan. Mihçiyî va ‘wextê Osmanîyan ra nata kamcîn wexto ke qanûno bingeyîyêko newe ameyo viraştiş, dima ra ermenîyî mecbûr mendî ke koç bikerî’ û wina domna: “Qanûno bingeyî yê 1982î zî wina bî û şarê ermenî mecbûr mend ke koçê teberê welatî bikerî. Rejîmêko dîkta seba ermenîyan tim bîyo problem û eke ma ewro madeyê ke do referandûm de bêrî weçînitiş ra biewnî, ma do bivînî ke îxtîmal esto ke ermenîyî travmayêka hîna girdêr bicuyî. Sey nimûne merdim eşkeno weçînayîşê Patrîkî ra biewnîyo; Serekê ermenîyê Tirkîya Mesrob Mutafyan 9 serrî yo ke nêweş o û nêşêno karê xo bikero. Komelê ermenîyan her çiqas ke seba xo qeymeqamêk weçînayo, o zî hetê Walîyê Stenbolî ra nîno qebulkerdiş. Îxtîmal esto ke qayûm tayînê ewja zî bikerî.”
Do zafêr piştî bidî
Mihçiyî dewamê qiseykerdişê xo de va ‘Referandûm roja Roşanê Paskalya de yeno viraştiş û her çiqas ke Parlamenterê HDPyî Garo Paylanî nêyî ard ziwan zî ti kes ey goşdarî nêkerd’ û wina va: “No daxî nîşanê ma dano ke AKP senî nizdîyê kêmhûmaran beno. Se ra 90ê ermenîyan do referandûm de vajî nê. Ermenîyî bi hawayo ke heta nika qet nêameyo dîyayîş, do wina piştî bidî kampanyaya ‘nê’yî. Eke referandûm de nê bivejîyo, no welat ser de do tîje newe ra biakera.”
ANF/STENBOL