Unîversîteya Artûklû ya Mêrdînî de prosesê çareserîye de Enstîtuya Ziwanê ke Cuyenî amebî akerdene. O wext herçiqas ke seba Kurdî destûr amebi girewtene zî dima ra beşê Suryanîkî û Erebkî zî abîyî. Mîyanê demî de Erebkî hîna zaf vejîya aver û Kurdî tepîya mende.
Enstîtu de lîsansê bitez û bêtez ameyêne kerdêne û heta nika 70ê ci bitez û 699ê ci bêtez xebatê lîsansî ameyî kerdene. Labelê nika Senatoyê Unîversîte qerarê padayîşê Entîtuyê Ziwanê ke Cuyenî girewt û qerar erşawit YOK rê.
Melumatê padayîşî hetê Nuştox, Şaîr û Akademîsyeno Kurd Selîm Temoyî ra medyaya komelkî ser ro ame pare kerdene. Temoyî dîyar kerdo ke Senatoyê Unîversîteya Artûklû ya Mêrdînî qerarê padayîşê Enstîtuyê Ziwanê ke Cuyenî girewto û erşawito YOK rê û wina vato: “Dişmenîya rektoro ke eslê xo de Kurd o û bi vatişê Îhsan Elîaçikî ‘Fikrê DAÎŞî paweno’ vera Kurdî de nêqedîyeno.” Eke qerar hetê YOKî ra bêro tesdîqkerdene, beş do bêro padayene.
AMED