Erdogan û AKP semedê ke weçînayîşê 7’ê hezîranî konsepteko şer kerdî dewre. Çarçiyeya no konseptî de xeylê qetlîyamî amey viraştiş. Nêy demê peynî de şaristananê Kurdistanî de erebeyê bêplakaye vêşî bîy û kesê ke mîyanê nêy erebeyan de bi awayo pergalî û plankerde şarî qetl kenî. Babete sero Wekîlê HDPe Îdrîs Baluken qalî kerd.
Huqiqî nas nêkenî
Baluken babete sero ard ziwan ke AKPe dijî şarê kurd yew şero gird dayo destpêkerdiş û wina domna: “No şero ke dayo destpêkerdiş de ti huqiq çino. Rewşo asayîn de şerî de ehlaq û huqiq esto labelê şero ke AKP dayo destpêkerdiş de ti ehlaq û huqiq çino. Çi zilm û heqaret ke serranê 90’î de ameynê kerdiş, ewro zî bi talîmatê Erdogan û AKPe heman awayî yeno kerdiş. Wexto ke ma ewnîyenî, mîyanê şaristanî de cenazeyê kurdan ra îşkence yeno kerdiş û yeno teşhîrkerdiş. Rayna nêverdanî ke şar cenazeyê xo oxir biko û Cizîr de cenaze hîrê roje mîyanê dolaba cemedî de amey tepiştiş, mezelê şehîdan amey texrîpkerdiş.”
Qetil û raybazê ci
Baluken dergeyîya qalîkerdişê xo de bal ant ser erebeyê newe ke demo peynî Kurdistanî de yenî dîyîş û wina dewam kerd: “Senî ke serrê 90’î de dewlet ciwananê kurdan girewtênê qetil kerdênê û bade zî vatênê kiştoxê ci nêdîyar o, ewro zî heman awayî bi destê Erdogan û AKPe yenî kerdiş. Nêy heme qetlîyamî serranê 90’î de bi erebeyanê ‘Toroso Sipî’ ameynê kerdiş. Eyro zî zîhnîyet heman zîhnîyet o, rayna Kontrgerîlla, JÎTEM, Gladîo û sewbîna heme çî eynî yo. Tena çîyo ke ameyo bedilyayîş aye erebe yî. Yanî eyro herinda ‘Torosêo Sipî’ erebeyanê ‘Land Rover’ yenî xebetnenî. No semedî ra demokratîkbîyîşê dewletî ke her tim yeno ziwan werte ra wedarîyeno.”
Zey modelê DAIŞe
Balukenî qalîkerdişê xo de ciresna ke dewlet bi kontrayan şarî ceza kena û wina vat: “Kesê ke mîyanê nêy erebeyan de yî welatijan rê gefan wanenî û vanî ke ma serê şima birnenî û kerdişê DAIŞe reyde şarî wazenî bitersnî. Hetta şarî ma yê Cizîr, Farqîn, Gever û sewbîna de vanî ke kesê ke mîyanê nêy ereban de hêrişî şarî kenî him tirkî û him zî kurdî qalî kenî. Nêyî heme nîşanê ma danî kesê ke mîyanê nêy erebanê Fordî de yî, zey modelê DAIŞî têgêrîyenî. Çimkî wexto ke DAIŞ mîyanê Rojawanî de qetlîyam viraştênê mîyanê ci de endamê MÎT û JÎTEMe estbî. Êy ke aye çeteyê DAIŞe perwerde kerdî, hetgirê DAIŞe bî. Eyro zî înan ardo Kurdistano Vakûr û pê qetlîyaman virazeno.”
Do hesab bidî şarî
Baluken dîyar kerd ke nêy kesê ke gonê şarî rijnenî do hesab bidî û qalîkerdişê wina peynî kerd: “Nêy tîmê înfazî hemverê dîrok û şarê ma de îllakî do hesab bidî. Ger ke şima ewro baldar bibî qetilkarê serrê 90’î Dogan Gureş, Tansu Çîller, Suleyman Demîrel bî, ewro nameyê înan bêxra qetlîyaman nîno ser ziwanî. Aqubetê Erdogan û Davutogluyî zî do heman awayî bibo. Yanî aqubetê Çîller û Agar înan senî bi se, aqubetê Erdogan û Davutogluyî eynî yo. Şarê ma wazeno hesap bêro persayiş.”
Muhîmîya weçînayîşê 1’ê Teşrîne
Baluken aşkera kerd ke Erdogan weçînayîşê 7’ê hezîrane de vinî kerd, Meclîsî ra yew kilîdo gird dapiro, yanî Meclis nêxebetya û ewro nêxebeteno zî û hetanê nika Meclîsî de komîsyonekî zî nêameyo awankerdiş û wina vat: “Hetê nêyî de ser çapemenîye sansureko gird esto. Rayna heman sansur ser ma û partiye ma sero zî esto. Ger ke meclîsî de sansur nêbînê û Meclîs zî biameynê xebetyayîş aye wext ma do hîna baş çîyê ke yenî cuyayîş biresnî şarê Tirkîyaye.”Baluken îzeh kerd ke semedê ke çapemenîya azad ke sey DÎHA, Azadiya Welat û sewbîna nêy qetlîyaman sero nusenî hetê hukimatî ra raştê yew sansur û tedayeko gird yenî, tîya de muhîmîya weçînayîşê 1’ê Teşrîne vejyeno werte. Ger ke HDP netîceyeka gird bigîra do serkewtî bêro.