Çeteyanê AKP roja verî Dersim de eştî şaredarî û keyeyê sîyasetmedar ser û hemşaredaranê sûk Nûrhayat Altûn û Mehmet Alî Bûlî ra pîya 12 kesî amey tepiştiş. Vizêr zî şaredara verî yê DBP û parlementera verî yê HDP Edîbe Şahîn kî tepêşîya.
Gurekaranê şaredarî binçim girewtişan ra dima damûstayîna pîyayî da û hewldayenê xespkerdişî rê nêrazîbîyen damûsnay. Tepiştişê hemşaredaran ra dima AKP wext vindî nêkerd û desinde qeyûm tayînê şaredarî kerd. Wezîrîye Karê Zerrî hurendîya Altûn û Bûlî de yardimkarê walîyê sûk Olgun Oner zey qeyûm tayîn kerd.
2004î ra na het destê DBP de ya
Dersim jew cayo ke dewlet tewr jêde polîtîkayê asîmîlasyon, dejenerasyon û qirkerdişî dana ramiten o. Şaredarîya sûk ke weçîntayisanê 2004î de kewt destê BDP, Weçîntayisanê Heremî yê 30ê Adar 2014î de kî destê DBP de mend. Dersim de DBP %42.4 rey girewt û Mehmet Alî Bûl û Nûrhayat Altûn jê Hemşaredarê sûk amey weçîntayen. La nika eve behaneyê kêfî hemşeradarî rehîn amey giroten.
Hemşaredar Nûrhayat Altûn ke verîya çend aşman mulaqat dabi rojnameyê ma ardbî zon ke rîwalo ke DBP eve sîstemê hemserokîn kewt weçîntayisan û her hetî ra alternatîf ronena hedefê sereştişanê AKP de ya.
ANF / DERSIM