Qezaya Çorlu ya Tekîrdagî de trenê raywanan rayîr ra vejîya. Netîceyê qezayî de hûmara merdeyan resaye 24 û 318 kesî zî birîndar bîyî. Xebatê raselisnayîşî dewam kenî. Hedîse ra dima bi seyan ambulansî şîyî cayê hedîse. Labelê seba ke cayê qezayî bejrayîrî ra durî de yo, dewijan birîndarî bi traktoran kiriştî.
Derheqê hedîseyî de tehqîqat dîya dest pêkerdene. Merdimê kesê ke qezayî ver merdî, vernîya morgê Nêweşxaneyê Dewlete yê Çorlu de kom bîyî.
Hemsereka Pêroyî ya HDPyî Pervîn Buldane derheqê hedîseyî de îzehet daye. Buldane wina domnaye: “Ma kesê ke ewja de merdî rê serweşî, birîndaran rê zî şîfaya leze wazenî. Çîyo ke Çorlu de ame cuyayene, qeza nîyo, cînayet o. Îdarekarê Rayîrê Asinî yê Dewlete û Wezaretê Resnayîşî berpirsîyarê hedîseyî yî. Tîya de îhmal û bêtedbîrîye estî. Ganî kesê ke berpirsîyarîya înan esta, bêrî ceza kerdene. Ma do destûr nêdî hedîse bêro padayene. Ma do bi heyetêko gird şêrî cayê hedîseyî.”
TEKÎRDAG