Yew vîdeoyê Amed-Sûr ame vilakerdiş. O vîdeo eskerê dagirker yê tirk anto, reyna eskerê tirk vilakerd o. Vîdeo de qijê kurd yê keyna û lajê bibî. Vîdeoyê serra 2016 o. Wextê ke Amed-Sûr de xoverdayîşê o îdarekerdiş bibi û ucaxî ameyo antiş. Vîdeo de eskerê tirk vendenê qijanê kurd û înan yew bi yew çîprût û zilût kenê. Ser ra zî yarî û heqeret qij û şarê kurdî ra kenî.
No vîdeo ser qijê Fîlîstîn bibenê pêronê dinya qiyamet rabênê. Hele Kurdistan û Anatolî de çiqasî muslumanê sextê estî, do camîyan de kam bibenê û meş biviraştênê. Şîyar bieştenê bivatênê “Sîyonîst Îsraîl!” falan fîlan. Rayedarên tirk sey Erdogan înan zî xo wayîrê Fîlîstîn nîşanbidenê, do pêronê AKP’yîyan qor bi qor qiseybikerdênê. Bivejîyenê meydanan û repûtpe bikerdênê. Xo sey musluman nîşanbidenê. Ser ra zî qey qijê Fîlîstîn bivatênê generalê qijkek.
Aynî AKP’yî û muslumanê sextê, qijê kurd ra vanî terorîst, qijê terorîstan. Qijê kurd çîprût û zilût kerdiş kiştê ke de, qijê kurdî ra vanî terorîst û qişenê.Qoser de Uxur Kaymazê 12 serrî pê 13 gulayan kişt. Darahênê de Xezal(Ceylan)) Onkol pê gule topan kişt. Cizîra Botan de bebeka hîrê aşmî Mîray pê suîkastî kişti. Reyna Cizîra Botan de bebek Mehmet Uytun hini kişt. Hetê komkiştişên kurd de dewleta tirk tam qirkera. Xora komkiştişê Dersîm de pîzê dayîyan de qijê kurd kiştibî. Dewleta tirk, serrê 1980 an ra hetanê nika en tayî 400 û 500 qijê kurd kiştî. Dewleta tirk hetê kiştişê qijan de qetilê bebekana.
Pêronê dewletê dinya bêrênê pêser, reyna qasê dewleta tirk zalimkar nîyê. Reyna pêronê dewletê musluman ayê dinya bêrênê pêser qasê dewleta tirk hetê muslumantîyê de sextekar nîyê. Qasê dewleta tirk zulmkar nêbenê. Dewleta tirk wexto ke babet bibo şarê kurd, bena kor. Nêvana bebek, nêvana cinî, nêvana camêrd, nêvana pîr û pîrik, komkiştiş virazena.
Dewleta tirk de ne prensîbê şer, ne zî prensîbê exlaqî estî. Seba ke şarê kurd wertira rabikero, çîyo ke qes xeyal nêbikero pêronê nê çîyan kena. Çunke dewleta tirk estîbîyayîşê xo ser çinbîyayîşê Kurd û Kurdistan awankerd o. Goreyê nayî dîplomasî, ekonomî, perwerde, sîyaset û eskerîyê xo rêxistinkena. Merhaba dana yewî vana bê dişmenîya Kurd û Kurdistan bikeri, ez hina hina pereyan dana şima. Ez hina hina îhaleyan dana şima. Ez hina hina to ra mal gena.
Wexto ke yew biewno nê çîyanê dewleta tirk, raştî ra kam sîyonîst o, kam zulimkar o hîna bi zelalî vejîyeno werti. Wexto ke AKP-dewleta tirk û muslumanê sextê vanî qijê Fîlîstînî yew bizana ke sextekarî kenî. Bi ne edebîyatî wazenê qijê kurd bikişenî.
Gera herkes bizano ke wexto ke AKP û dewleta tirk qijê kurd bikişo, çîprût bikero heqê şarê kurdî ze esto ke qesasê xo bigero.