BARIŞ POLAT / MA / RIHA
Îsoto perik yê Riha ke namdar o, heta ke virazîyeno hêga ra heta bazaran xeylê merhaleyan ra derbas beno. Îsotî hêgayan ra arê dîyenî û wareyanê vengan de yenî rakerdene. No rakerdene hetê şarî ra sey Sergîya Îsotî yeno namekerdene.
Bi nameyê Îbrahîm Bayirî de keso ke dezgehanê îsotî de xebetîyeno, qisey kerd. Bayirî va ‘îsoto perik yo tewr baş îsotê cayîyan ra yeno viraştene’ û wina domna: “Badê ke îsot yeno pakkerdene, makîneyan ra yeno derbaskerdene û toximê ci yenî girewtene. Dima ra çadiran ser o tîje de ver de yenî rakerdene. Rakerdişî ra dima îsotî wişk benî. Ma goreyê waştişî reng bi reng wişk kenî. Tewr peynî ma makîneyan ra derbas kenî û yax kenî. Yaxkerdişî ra dima îsot rotiş rê amade yo.”
Rotoxê îsotê perikî Halîl Karakûrtî zî wina va: “Îsoto perik ke destan reyde yeno viraştene, fekê merdimî de tûjîyêka şîrine verdano, labelê o ke fabrîka de yeno viraştene, mîdeyê merdimî dejneno. Ê desten fabrîka ra zehmetin o û başêr o. Ê ke fabrîka de yeno viraştene de yaxo ercan yeno bikarardene. Ê ke destan reyde virazîyeno zimistanan seba tayê nêweşîyanê sey grîb, astim û bronşîtî rê feydeyê ci esto. Werdê ma bê tûjî nêbenî. Heta nika ma qet zirarê ci nêdî, labelê feydeyê ci zaf î.”
Riha îxracat de Tirkîya de bajarê 4. a
Esnafê bi nameyê Coşkûn Aydedeyî zî va ‘îsoto perik yê Riha îsoto dolma ra yeno viraştene’ û wina dewam kerd: “Fabrîkayan de bi îsotê tûjî reyde yeno viraştene. Tehm û kalîteyê ci zî cîya yî. Xora merdim senî biwero fam keno û ê destan vîtamînê ci hîn zêdeyêr o.”
Îsoto ke qala zaf feydeyê ci yena kerdene, bazarê dinya de qet çin o. Goreyê daneyanê Dezgehê Îstatîstîkî yê Tirkîya pêro pîya 3 û 3 û nîme mîlyon Dolar yeno rotene. Labelê nê rotişî de bajaro sifteyîn Îzmîr o. Îzmîr ra nizdîyê mîlyon û 300 hezar Dolar îsoto perik roşîyeno. Dima ra Dîlok û Gurgum yenî. Riha ra zî qasê 80 hezar Dolar îsoto perik roşîyeno.