Badê ke qayûm tayînê Şaredarîya Bajarê Girdî ya Amedî bî, tîyatroyê şaredarîye amebî padayîş. Nêyî ver aşma sibate de Tîyatroyê Bajarî yê Amedî amebî akerdiş. Tîyatroyê Bajarî dima ra kulturê Qirixî kerdbî kay û vetbî dîk. Bingeyê kayî bi karîkaturanê Dogan Guzelî ameyo awankerdiş. Kay pêro pîya 19 karîkaturan ra pê yeno û derhenêrîya kayî hetê Kemal Gokhan Gursesî ra yena kerdiş. Kay de karakterê Keko, Kuto, Çeto û sewbîna ci estî. No kay heta nika sere de Kurdistan û zaf bajaranê Tirkîya de ame kaykerdiş û raştê zaf eleqeyêko gird ame.
Babete ser o Kaykeranê Tîyatroyê Bajarî ra Berfîn Emektare va ‘ma badê ke qayûm tayînê şaredarîye bî, aşma sibate de Tîyatroyê Bajarî yê Amedî awan kerd’ û wina dewam kerde: “Heta nika pêro pîya 4 kayî vetî û nika zî ma ser 2 kayan de xebetîyenî. Kayê Qirixî bi karîkaturanê Dogan Guzelî ra ame nuştiş û no zî fikrê Kemal Gokhan Gursesî bî.”
Emektare dewamê qiseykerdişê xo de va ‘bi tayînbîyayîşê qayûmî sey şaxê bînî yê hunerî, tîyatro zî derbê girdî girewtî’ û wina domnaye: “Labelê ma xebatanê xo bêmaben domnenî. Qirix Amed de kultirêk o û Dogan Guzelî zî nê kultirî bi herkesî dayo heskerdiş. Heta nika ma kayê Qirixî Kurdistan û Tirkîya de zaf cayan de kay kerd. Nika zî ma do mabênê 1ê êlule û 20 êlule de Ewropa de bibîy. Ma pawe yî heme şarê ma yê Ewropa bêrî kayî temaşe bikerî.”
Kay do Mabênê 1 û 3ê êlule de Berlîn, 2ê êlule de Hamburg, 6ê êlule de Dortmund, 7ê êlule de Essen, 8ê êlule de Koln, 10ê êlule de Parîs, 12ê êlule de Marsîlya, 16ê êlule de Amsterdam, û 18ê êlule de Lîege de bêro kaykerdiş.
NAVENDA XEBERAN