Qirkerdiş est o la çew wayîr nêvejîyeno!

Taybetê çend rojake rojdemê sîyasetî Tirkîyaye de qirkerdişê Dêrsime esto. Verên serekkomar Erdogan qirkerdişê Dêrsime ser vat bi di Dêrsime de qirkerdiş ameyo kerdiş. Peynîya no vatişê zî nika serekwezîr Ahmet Davutoglu zî heqê qirkerdişê Dêrsime vat; ‘Dêrsim Kerbela ya hemdemî yo.’ nê qirkerdiş ra zî CHP û Îsmet Înonuyî berpirsîyar mojnay. Verba no vatişan CHPî bêveng vindert û Kiliçdaroglu zî dêrsimij o  la di na babete de qise nêkerd. Hetkardoxê serekê CHPî Sezgîn Tanrikulu zî nameyê partîya xo lêborîn waşt û no lêborîn zî di Dêrsime de bi semedê krîzî.BERPIRSÎYAR KAM O?No rojdemê ser di zanîngehe de mamoste Koray Çalişkan zî qirkerdişî ra AKP berpirsîyar mojna û no vatişê zî persa berpirsîyar kam o? rojdemê Tirkîyaye ard. Babete ser Çalişkan vat ke di hetê Sezgîn Tanrikuluyî waştişê lêborîn muhîm yew rewş a û wina vat: “No averşîyîş pozîtîf o. Tirkîya dîroka xo tarî ra gam eşt. Waştişê lêborina Tanrikuluyî, tarî no demî belkî roşn bikero. Ganî qirkerdişî Dêrsime bêro aşkerabîyîş. Tena qirkerdişê Dêrsime na welate de nêame cuyayiş û qirkerdişê Sêwaz, Gurgum, Çorum û Roboskî zî amey cuyayiş.”Çalişkan dîyar kerd ke di qirkerdişê Dêrsime ra zî Celal Bayar û ekîbê ey berpirsîyar o û wina dewam kerd: “Huseyîn Aygun heme deyîrê kirmanckî ser cigêrayiş kerd û nê deyîran de qet nameyê Ataturk û CHPî nêvîyareno. Zatî provokasyonê Adnan Menderes ser zî di Tirkîyaye de qirkerdişê 6/7 ame cuyayiş. Goristanê Celal Bayar ra, serekkomar Erdogan şona Fatîha wanena, nê kesan asil temsîlkarê qirkerdişî yê. Berpirsîyarê sîyasî yê Roboske yê Recep Tayyîp Erdogan o. Hema zî maxdûran ra Erdogan lêborîn nêwaşto, hetta maxdûran berpirsîyar mojnayo. Davutoglu lêborîn zî biwazo çew bawer nêkeno.”DI TIRKAYEY DE DEMOKRASIÇalişkan ciresna ke ganî zey meseleyê Dêrsime aşkera bibî û no ser zî gamê şenber bêro eştîş û wina domna: “Tena di Tirkîyaye de meseleyê Dêrsime çin o, meseleyê Amed, meseleyê zîndana Amed û Roboske zî est o û hema zî nêameyê aşkerakerdiş. Di dinyaye de nê meseleyan senî yena çarekerdiş dîyar o. No ser zî ganî sazbîyîşê komîsyona heqîqetî şert o. Heme dinya nê qirkerdişan xo ra ders vetî. Tena ma aştî kerdî û ma şer nêkenî de nêbeno. No rayîr, rayîrê çareserî nîyo. AKP nêwazeno ravêreyeye averbero. Tena hetanê weçînayişan şarê Tirkîyaye mijûl kena. Qet çareserîya meseleyan ser gamê        şenber nêerzena.”

DÎHA/ENQERE

---

Zîhnîyeta qirkerdişî hema zî domyeno

KOMELEYA DÊRSIMIJÊ ENQEREYE seba vîrardişê Seyîd Riza û embazê ey ser di verê Berê Dîkmena Meclîsê aşkeraya çapemenîyî da. Di aşkerayî de beşdarwanê dirûşmeyê ‘Dêrsim qirkerdişekî gird o û vîr meke û medî vîrkerdişî’, ‘Tertele Dêrsime xo vira mekere’ û ‘Dêrsime rûmet a û rûmeta xo ra wayîr bivejî’ qîray. Beşdarwanê seba sembolkerdişê qirkerdişê ser xo kefen kerdî. Di aşkerayî de serekê Komeleya Dêrsimijê Enqereye Yaşar Kilavuz qise kerd. Kilavuz vat ke di dinyaye de zey qanûnê Tuncelî çin o û wina vat: “Bi no qanûnê di yew roje de Seyîd Riza û embazê ey amey dardekerdiş. Seyîd Riza û embazê ey tena bi biryarê fermandereke amey qetilkerdiş. Hema zî dêrsimijan qirkerdişî vîr nêkerdî û hema zî ser elewîyan polîtîkayê qirkerdişî domyenî.”

ENQERE

---

HDKî ra seba Dêrsime mojnayiş

DI VERÊ Abîdeya Merdimatîya Papola Yukselî de endamê Kongreya Demokrasî ya Şaran kom bîyê û seba vîrardişê Seyîd Riza û embazê ey mojnayiş akerdî. Di mojnayişî de maxdûrê qirkerdişî yê cenî û broşûrê no demî bi wêneyan beşdarwanê ra amey mojnayiş. Hewna endamê HDKî seba Kobanê ra paştîdayişî aşûre vila kerd. Mojnayişî ra di zaf hûmarîy de welatijê elaqayeke zaf gird mojnay. 

ENQERE

---

Gerîlayan zî Seyîd Riza vîr ardî

Rayverê serehewanayişê Seyîd Riza, 77 serrê verê di navenda Xarpete ame dardekerdiş û pêroyina Tirkîyaye de şermezarkerdişî no qewimyayişî ser merasîman yenî viraştiş. Di Dêrsime newela Lace ya Şikefta Qemerê Hesen de zî gerîlayê HPG û welatijan vîrardiş viraştî. Sifteyin verê vîrardişê seba şehîdê Dêrsime rêz ame girewtiş û peynî zî gerîla û welatijan bi hemberî mume veşnay.

DÊRSIM - DÎHA

---

Goristanê Seyîd Riza kura yo?
Komeleya Pîlemûrîyeyijan, Komeleya Dorûverê yê Munzure û Komeleya Aguçarî bi hembarî Seyîd Riza û embazê ey vîrardişê rê di verê Lîseya Galatasarayi de merasîm viraştî.  Merasîme ra hunermend Ferhat Tunç, hunermendê MKM û di zaf hûmarîy de welatijê beşdar bîyê. Beşdarwanê pankarta ‘Ma do hesabê qirkerdişê Dêrsime bipersî’ akerdî. Hewna seba şehîdê qirkerdişê Dêrsime rê deyîrê kirmanckî amey vatiş.

 Di merasîme de endamê Komeleya Dorûverê Munzure Hatun Esen qise kerd. Esen vat ke dewleta tirk seba şarê Dêrsime ra heyf girewtişî Seyîd Riza û embazê ey qetil kerd û wina vat: “Qet di daraznayişê Seyîd Riza û embazê ey de huqûq nêameya şuxulnayiş. 70 kesî amey daraznayiş û 7 kesî amey dardekerdiş. Tena Seyîd Riza û embazê ey dewleta tirk qetil nêkerd û ardvînaya Kurdistanî ra zî gonî vila kerd.”

STENBOL - DÎHA