24ê Nîsane 1915 de ermenîyî raştê qirkerdişêko gird ameybî û emser serrgêra 102. yê nê qirbîyayîşî ya. Tevgerê Yewbîyaye yê Demokratîke yê Şaran (HBDH) zî derheqê qirkerdişî de îzehetêko nuştekî da.
HBDHyî îzehetê xo de vato polîtîkayê ke 102 serran ver hetê îqtîdarê Osmanî yê ê wextî ra vera ermenîyan de ameybî kerdiş, ewro bi destê hukmatê AKPyî ra yenî domnayîş.
Yew ale, yew netewe û yew dîne
Îzehet de ameyo vatiş ke ‘wexto ke tarîx 24ê Nîsane 1915 nawitêne, qeraro ke binê ci îmzeya Wezîrê Karê Zereyî yê Osmanî Mehmet Talat Begî zî estbî, derheqê roşnvîr, nuştox, parlamenter, hunermend û sewbîna kesê ke mîyanê ermenîyan de rayberî kerdêne de qerarê tewqîfkerdişî ame girewtiş’ û wina dewam kerdo: “Bi no hawa prosesê qirbîyayîşê ermenîyan dîya destpêkerdiş. Seba newe ra şekildayîşê zîhnîyetê neteweperest yê Osmanîyan ermenîyî ameyî qirkerdiş. Bingeyê yew beyraqe, yew netewe û yew dînî bi qirbîyayîşê ermenîyan ronîya û dînamîkê awanbîyayîşê Komare zî qirkerdişo ke destê Îttîhat Terakkî reyde ame kerdiş, vejîya orte. Her çiqas ke 102 serrî ser qirkerdişî ra derbaz bîyî, ewro reyna zî qirkerdiş yeno înkarkerdiş. Ganî şarê ermenî ra ozir bêro waştiş û heqê sîyasî yê tarîxî bidîyo înan. Ganî qet nêro vîrîkerdiş ke qirkerdiş sere ra heta peynî ameyo plankerdiş û sucêko merdimî yo.”
AKP qirker o
Dewamê îzehetî de ameyo vatiş ke ‘sîyaseto ke bingeyê AKPyî de esto dewamê nê sîyasetê qirkerî yo’ û wina dewam kerdo: “AKP û quwetê faşîstî yê ke dormeyê AKPyî de kom bîyî, bi hêrişkarîya xo heme şaran hedef gênî. Faşîzm şero ke vera şarî de yeno dayîş o. Faşîzm eynî wext de vera kedkar û sinifa karkeran de şer o. Faşîzm yeno manaya qetilbîyayîşê Hrant Dînk, Cizîr, Sûr, Alî Îsmaîl, Roboskê, Tahîr Elçî, Nisêbîn û Ugur Kaymazî. Ewro netîceyê referandûmî zî nîşanê ma dano ke do şarê ma vera faşîzmî de xover bido. Cok ra ganî vera hêrişê faşîzmî de barîkatêk bêro awankerdiş, Tirkîya û Kurdistan de heme waran de têkoşîn bêro berzkerdiş. Ewro girdkerdişê Tevgerê Şorişo Yewbîyaye sey wezîfeyo lez û nîno taloqkerdiş vernîya ma de vindeno.”
Wazenî şarê ma teslîm bigîrê
Peynîya îzehetî de wina ameyo vatiş: “Wazenî ke şarê ma bêalternatîf veradî û bi hêrişan teslîm bigirî. Senî ke hîle, qetlîyam, zext, teda û îşkenceyî nêşênî şar bidî vindarnayîş, do akewtişê tîje, abîyayîşê berfînan û azadî, seyyewbînanî û edalet zî nêşîyeno bidîyo vindarnayîş. Ewro roje roja vera faşîzmî de hesabperskerdiş û yewîya ermenî, rûm, kurd, tirk, ereb, çerkes, laz û suryanîyan a. Ma veng danî şarê xo ke wa vera faşîzmî de biwerzî payan ser û binê beyraqêk de bêrî têhet, bajar û koyan de beşdarê ‘Hêzê Xoverdayîşî yê Yewbîyaye’ bibî û faşîzmî ra hesab bipersî.”
Heto bîn ra, bi sebebê serragêra jenosîdî, vizêr Ermenîyan û Kurdan paytext Erîwan de vîrardişê qirkerdişî zîyaret kerd.
NAVENDÊ XEBERAN