Qezaya Amed Sûr de, ablûqe û terora dewlet 85. roj de ramena. 200 welatijê ke bodriman de mexsûr mendê, bi talokeyê înfazkerdiş ra rî bi rî yê. Vizêr walitî aşkere kerd ke seat 16.00’î de sivîlî êşkenê tehliye bibê. La nezdiyê na seat bombevornayen destpa kerd.
Welatijî bi qetilkerdiş ra rî bi rî yê
Welatijê ke bi rojano bi qetlîamanê dewlet ra rî bi rî mendê, serva verîgirotişê qetlîam vengê dekewtişê hereket kerdî. Remziye Tosûn ke bi di gedeyanê (qeçek) xo ya piya bodrim de menda aşkere kerd ke, tayn mendo ke ban ser înan de birijiyo. Keynaya ci Şevîn Tosûn a 10 serrî zî da zonayen ke, helîkopterî êrişê keyeyê înan kenê. Ceniya bîn Amîne Abîş ke bodrim de ya zî va, se ke ma terkê merdiş biyê.
Heto bîn ra, dîmeno ke vizêr jew keyeyê Sûr ra ame, rewşê welatijan rafîna ver çiman. Keye de, jû cenî bi 6 qeçekanê xo mexsûr menda. Qeçekan ra didiyê ci dirbetinê. La rexmê talokeyê merdiş û sereştişanê dewlet, welatijî fina zî keyeyanê xo nêterknenê.
Mêrdîn Dêrik de, çi qe hetê fermî ‘qedexe’ îlan nêbiyo zî, la şeş rojiyo fina êrişê dewlet destpa kerdî. Di rojanê peynî de, di welatijî hetê quwetanê dewlet amey înfazkerdiş.
Dêrik de onca rayê dekewtiş û vetişê qeza tomet kerdî. Topvaranê dewlet ra piya hedef girotişê kesanê sivîl zî ramenê. Di rojanê peynî de welatijê bi nameyê Ercan Sayan û Ramazan Eroglû amey kişten. Heto bîn ra, heyetê parlamenteranê Awrûpa ke waştî dekewê qeza hetê eskeran amey manîkerdiş.
60 welatijî kişiyay
Dêrik de 3 aşmanê peynî de 60 ra jêde welatijî amey qetilkerden. Dewleta ke nêşa bi waştenê xorayverîn yê şarî, bi ‘qedexeyanê’ fiîlî reyna destpa êrişan kerd. Qeza de 26ê Mijdarî de ‘qedexe’ roniya û 8 rojî ramite. Mavêna nê rojan de xêlê keye amey rijnayen, veşnayen û texrîbkerden. 26ê Mijdarî ra tepya qeza de operasyonê binçimgirewten zî dest pa kerdî. Heta nika 60 ra jêde kes tepêşiyay. Hemşaredara Dêrik Sabahat Çetîn bi panc kesan ra piya roja amê binçimkerdiş.
DÎHA/MÊRDÎN
Cizîr de delîlan vindî kenê
Cizîr a Şirnex ke bi fermanê rejîma Enqera qirkerden viraziya de ablûqe û êrişê dewlet roja 73. de ramenê. Taxa Yafes de quwetanê dewlet pey xo de enkaz terna. Tax de bi seyan keyeyî rîwalê êrişan welişiyay. Taxa Dagkapî ya Cizîr de zî çeteyanê AKP êrişê mezelxaneyê Asrî kerdî û mezeleyê HPG û YPGyijan texrîb kerdî.
Taxa Cûdî de ke 150 welatijî amey qirkerdin de ablûqe ramena. Kuçeyanê Narîn, Akdenîz û Bostanci de dewlet gureyînê vinîkerdişê delîlanê sûcî ramena. Bi maşîneyanê kar û kepçeyan enkaz hewadenê û hewl danê ke pey de jew delîlî nêternê.
DÎHA/ŞIRNEX