Serekê Dewletê Yewbîyayeyî yê Amerîka Donald Trumpî beyanatê da û va “Ma Qudisî sey paytextê Îsraîlî qebûl kenê.” Nê beyanatî ser o Tirkîya, welatê bînî yê muslumanî û tayê kurdê ehmeqî qiyamete qilanenê. Tirkîya û vakurdê Kurdistanî de tayê kesê qaşo musluman ê bi alayanê filistînîyan a vijênê kuçan, camîyan ver û qira xo dirnenê. 

Wexto ke muslumanan Cizîr, Sûr, Silopî, Farqîn da topan ver û sî (kerra) sîyere ser o nêverdê, domanan nêşa cenazeyanê may û pîyan û may û pîyan zî yê domanandê xo hewa dê û cenazeyî bi hefteyan a cadeyan ser o yan zî dolabanê qeşayî de nimitî, vengê ê partî, komelan, kurdanê muslumanan nêvijîya, hetta zilmê dewlete rê çepikî cenay.

Wexto ke muslumananê erdîşpîsan Kobanî de gedeyî, cinî, kal û pîrê kurdan nay kardîyan ver, keyeyê înan veşnay, malê înan talan kerd, bê keynan û lajandê kurdan yê lehengan kes hawara kurdan ra nêşî. O wext ê kurdê ke nika Çewlîg û Amed de Ûlû Camîyan ver de seba Filistînî qina xo dirnenê kotî bî? Wexto ke muslumanan referandûm bahane kerd û Kerkuk îşxal kerd, alaya Kurdistanî kerde lingan bin, ê kurdê ke qaşo musluman ê kotî bî?  

Ruşwet (bertîl), dizdîye, sextekarîye îqtîdarê AKPî Waşîngton de, mehkemada Serrafî de dinya ra vila bî. AKP, nika seba eşkerekerdişê belgeyanê rişwet, sextekarîye û dizdîye zaf tengasî de ya. Cora wazena nê meseleyê Qudisî ra xo rê faydeyê yan zî karê vejo. 

Tayê kurdê bêaqilî yê ke cuya înan pêro bi aşiqbîyayîşê dişmenandê xo ya ravêrdo zî alayanê Filistînî kenê xo dest û bi AKPyîyan a vijênê kuçeyan. Wa Zerrab û şîrîgê ci; wezîrî, serokwezîrî bi se hezaran a milyon dolaran dekerê tûnikanê xo, ê zî bi ê pîzedê xo yê vêşanî û postalênê binqulan a kuçeyan de seba dizdan xo bidirnê. Homa aqil bidê înan! 

Propagandaya AKP û tayê qaşo çepan duştê “emperyalîzm” û “sîyonîzm”î de propangndayênda venge û sîyasî ya seba menfeetê xo ya. Tîcareto mabênê Îsraîlî û Tirkîya de vêşêrî demeyê îktîdaranê tirkan yê qaşo muslumanan de bîyo. Tirkîya, şerê dinya yê dîyinî ra tepya, Rojhelatê Mîyanênî de bî sey cendirmeyê Amerîka. Hetta şelwarê eskeranê xo zî Amerîka ra girotê. 

Ke ewro kurdî hewna bindest ê, sebebêndê ci yo muhîm zî no meseleyê “umete” ya. Ke kurdî muslumanî nêbîyayê, belkî nika azad bîyayê.  

Raşt o, zafêrê kurdan musluman ê. Labelê kurdê ke musluman ê, şenê bi ziwandê xo ya îbadetê xo bikerê? Ney. Şenê wazan, Quranî, Mewlûdî bi kurdkî ya biwanê yan zî goşdarî bikerê? Ney. Ka heq û huqûqê umete?

Ma kurdan vêşêrî, wexto ke îcab kerdo, kesî duştê sîyonîzm û emperyalîzmî nêvijîyayo. Vedat Aydin û Xetîb Dîcle zî daxîl, kurdan serranê 70î de bi awayêndo fîlî hetkarîya filistînîyan kerda. Labelê hema-hema heme dewlet û partîyanê ereban yewî zî meselayê heqê kurdan de hetkarîya kurdan nêkerda, nêkenê hetta duş ra vijênê.

Ganî ma kurdî baqil bê. Dinyaya ewroyîne de polîtîka bi qalibanê vêzêrî ya nêbena. Ganî kurdî bi propagandaya “umete” ya serxoş nêbê. Ganî gamê ma yê sîyasî verê goreyê menfeatê welat û şarê ma bê. No menfeat yew fine embazîya Amerîka, yew fine yê Rûsya, welatanê Ewropa yan zî Îsraîlî wazeno. 

Seke Alî Dore deyîrênda xo de vano “Anqara, meqamê wezîran, biveşo çîyê mi tede yo?” Wa qe Qudis biveşo, çîyê ma kurdan tede yo? Ke kurdê muslumanî camêrd ê û înan de çilka namûsê esta, Qudisê ma Kobanî, Cizîr, Kerkuk, Sûr û Dêrsim o. Kurdê ke nê cayan xo vîr ra bikerê û alaya Filistînî xo dest kerê û bivijîyê kuçan nêweş ê, hem zî nêweşîyêda înan a dînî ya afyonwarî ya esta!