Raa heqî de cayê çar elementî kî (zî) jê(sey) zerduştên zaf berz o. Nê; herre(hard), hewa, awe û adir ê.                           

Herre; ma wa. Her(heme) waxt xora dana. Ortê Heq û Neq Dîna de di çêrangan ra jû ya. Hardo dewres rê can a.                                                                                                                                     

Hewa; helmê dîna yo. Pêro can hewa ra helmê xo cênê. Îtîqat de asmên ra jû(yew) saye beno. Asmên kî ortê Heq û Neq Dîna de çêrangê sere yo.  Raa heqî de nê hurdemena cawo ke însan weşîya xo rameno uca yê. Na semed ra jêde minetî ebe(bi) “Hardo dewres asmêno kêwe” deske cenê.                                                                                                                                      

Awe; pakên u zalalên a. Canê ro ya. Rahmetê Heqî ya. Dêrsim de awa  Munzirî ser o sond wendîyo. Hewnê xiravinî awe rê qesey bîye.                                                                                           

Adir; çila bimbarekî yo. Adir hem roştîya, hem kî xiravenên rê pakîya. Raa heqî de însan ebe bulisk rusnîyo dîna. Mislimanên ra dima bulisk, zulfîkarê Olî(Elî) sa bîyo. Tayê waxtî, çikê adirî û zulfîkar jû pêcîyo. Na semet ra tayê zewtan de “Çikê Olî to ra niso” vajîyo. Belqa cayê adirî hondê zerduştên nîyo hema(labele) weşîye ramitene de cayê xo berz o. 

-Raa heqî de jû engure ke bibo, gereke a ortê çewres tenan de bihencîyo, dima(badê) bare bibo.  Mislimanîye de her dewlemend mal û milkê xo ser ra gereke çewres de jû bare(1/40) qamçur bido dewlete. Yanê raa heqî de  mal û milk ebe têduştîye bare beno.                                                                     

- Raa heqî de îbadeto homete cem o, mislimanên de namaz o.                                                    -Raa heqî de Heq, howt kat cor de, yanê Olî Dîwan de nîseno ro, mislimanîye de Heq heme ca der o.                                                                                                                                                   

-Raa heqî de însan, helmê Heqî ra pêda bîyo vajîno. Mislimanên de însan, herre ra pêda bîyo vajîno.                                                                                                                                                      

-Raa heqî de hacîyên cêmalê pîrî vênitêna. Mislimanîye de hacîyên ebe Kabe vênitene bena.

Raa heqî, teyna ebe îtîqatê sunnî-mislimanên nê, bektaşîyên ra kî zobîna wayîrê tayê çîmî ya. Cawo ke raa heqî weşîya xo ramita na cayan rê Kirmancîye vajîna. Na ca de zonê îtîqatî, kirmanckî û kurmancî yo. Na semed ra yo ke 1914îne de serva leşker(esker) pêda kerdena Osmanî, postnîşînê Hace Bektaşî Cemaleddîn Çelebî, wayîrê  raa heqî rê; “…pêro bîyê Kirmanc, serva xo bêaqil û bêmantiq jû dîn ardo hure” vato. Melîkoff ra gore; Alewîyên zobîna(sewbîna) jû dîn a. Ewro raa heqî û bektaşîyên têduşt der ê. Tayê nustoxî bektaşîyên ortê alewîyên de jû qol vênenê.  Ewro raa heqî rê zobîna jû xofan esto. Wayîrê raa heqî ebe mîsyonerêna cematan vurîna. Ewro dewlete(dugele) wazena ke wayîrê raa heqî û alewî-bektaşî pêser meyerê. Na semed ra tayê komelan û veqifan “resmî alewîyên” pêda kerde. Çimê dewletê verênan de hîre  ‘K’ zaf xofdar bî. Nê; “Kizilbaş, Kurd û Komînîst” bi. Hen aseno ke no qeyde ewro kî nêvurîyo. Hata nika na ruval ser o sarê kirmancîye zaf ont. Çike hîremena kî sarê Kirmancî de bîbî. Ewro dewlete  sarê Kirmancîye ça misliman sa kena gereke ney ser o bifikîrîme.   

Dewletî verênî ra hata nika alewîyî ebe taîfeyê roştî, hurufî, rafizî, bektaşî û  ebe alewî name kerdê.(Teyna raa heqî nasdayîşê ê ma wo) Ewro ê se vanê vazê, gereke pêro alewîyî; “Raye jûya surek hazar û jûyo” vazê û raa jûbînî rê kî wayîr bivejîyê.