Hemşaredar Gulten Kişanak, Endamê Komeleya 78’an ê Amedî û xeylê kesê ke demê derbeye de Zindana Amedî tepişte bî beşdarê ramojnayîşî bîyê.
54 resimî ke wendekar û hunermendan zindana Amedî sero viraştê do hewteyêk bêrê pêşkêşkerdiş. Serekê Komeleya 78’an ê Amedî Ganî Alkan akerdişê ramojnayîşî de qalî kerd û kesê ke na xebate de emeg dayo rê spas kerd.
Trawma dewam kena
Koordînatorê Merkezê Koordînasyonê Muzeya Zindana Amedî Necatî Pirinççioglu akerdişê ramojnayîşî de qalî kerd û wina vat: “Derbeya 12’ê Êlule 35 serr verê cu sey buldozerêk millet ser ra şi. Ma wazenê wa Zindanê Amedî bibo muze.la ma eyro vînenê ke zîhniyetê 12’ê Êlule Gever, Cizîr û Farqîn de hema zî dewam keno. Semedo ke wa onca sey 12’ê Êlule wazîyetêk nêro meydan, lazim o Zindana Amedî semedê vîr û vînayîşê şarî bibo muze.”
Ramojnayîş gêray
Qalîkerdişê akerdişî ra dima Hemşaredar Gulten Kişanak zî derheqê xebatan de hunermendan ra malumat girewt. Hunermend û beşdaran eleqeyêka germ nîşanî Kişanake da. Kişanak zî embazê xo yê Zindana Amedî dir derheqê 12’ê Êlule de terraqnayîşêk kerd.
AMED