Xespkerdişê Şaredarîya Sûka Pîl yê Amedî ra dima, şerê rantî her ke şino beno sûr. Birayê Wekîlê AKP Galîp Ensarîoglû Cîhan Ensarîoglû ke Amed de bi sextekarî yeno silasnayîş û Cûmalî Atîlla ke zey qeyûm ame tayînkerdiş, kewtî pê. Wezîrê Karê Zerrî ê Tirk Suleyman Soylû zî tewrê no şerî bi û peynî de şer qereqol de qedîya.
Goreyê zanayîşanê çimeyî, roja 15'ê Hezîran de Cîhan Ensarîoglû şi Şaredarîya Sûka Pîl û lîsteyê xo yê kesê ke bikero karî rona ver qeyûm Cûmalî Atîlla. Cîhan Ensarîoglû, verîya reydayîşê referandûma 16'ê Nîsane de weçîntoxan ra waştbi ke reyê ‘Ya’ bidê û bedelê ci de soz da bi ke înan bigîro kar. Qeyûm Atîlla zî dûştê nayî de vejya û lîste ver çimanê Ensarîoglû de dirna.
Ver Şaredarî de ame tepiştiş
Ser israra Ensarîoglû munaqeşe bi gird. Qeyûm Cûmalî Atîlla zî Ensarîoglû rê vato o tenya ferman Tayyîp Erdogan û Suleyman Soylû ra gêno, walî zî bîro do ci ra ferman nêgîro. Dima ra zî Ensarîoglû het de telefonê Suleyman Soylû kerdo. Ser nayî Soylû zî fermanê tepiştişê Ensarîoglû dayo û polîsê ke pawitoxîya Atîlla kenê û wezîfedarê ewlekarî yê şaredarî kewtî destanê Ensarîoglû û ey teslîmê tîma polîsan kerdî.
2 roj tepişte mend
Wekîlê AKPyij Galîp Ensarîoglû ke tepiştişê birayê xo aşnawit, bi lez û bez Anqara ra şi Amed û ewil bi qeyûmî ra qisey kerd. Rîwalê fermana Suleyman Soylû netîceyeke nêgirewt. Cîhan Ensarîoglû di rojî Midûriyeta Emniyetî ya Amedî de ame tepiştiş. Bado ke heyetê Serokwezîrê Tirkîya Bînalî Yildirim, Suleyman Soylû û wezîran roja 16'ê Hezîran de şi Amed, o wext ame veradayen.
Pereyê şarî girot û rema
Cîhan Ensarîoglû, ke par nameyê ci Walîtiyê Amedî ra kar girotiş de vîyarna, Nîsana emserr de zî bi sozhe ke Şaredarîya Sûka Pîl ê Amedî de bikero kar, însanan ra pere kerd are û dima ra rema.
Verîya nika zî walî Mûsa Işin o ke bi qeyûmê Şaredarîya Agirî û Wekîlê Agirî yê AKP'yij Cesîm Gokçe rîwalê lîste kewtbî pê.
ANF/AMED