14ê Hezîrane de qezaya Pirsusî ya Riha de namzedê AKPyî Îbrahîm Halîl Yildiz û çeteyê ci hêrişê esnafan kerdbî û netîceyê hêrişî de 4 kesî merdbî û 8 kesî birîndar bîybî. Hedîse ra dime raporê otopsîye ameybî amade kerdene, labelê nêdîyayêne keyeyê Şenyaşarî.
Goreyê qanûnî ganî raporê otopsîye bidîyo keyeyê mexdurî, labelê Parlamenterê HDPyî yê Dîlokî Mahmut Togrul û avûkatê keyeyê Şenyaşarî nêşînaybî raporî bigîrî. Raporê otopsîye de vejîya orte ke vucûdê Celal Şenyaşarî de herinda 6 guleyanê cîya-cîyayan estî. Mergê Şenyaşarî netîceyê ginayîşê guleyî de şîyayîşê gonîye ver bîyo.
Reyna goreyê raporî vucûdê Adil Şenyaşarî de herinda 17 guleyê sîlehanê cîya-cîyayan estî û 14 cayan de zî herinda derbeyî estî. Nê guleyî mesafeyêka nêzike de ameyî panîyayene. Rapor ra zî dîyar beno ke pî Haci Esvet Şenyaşar 7 cayanê xo ra vucûdê ci ameyo tirakerdene û 23 nuqtayan de herinda derbeyan ameyî dîyayene. Xora şahidanê hedîseyî dîyar kerdbî ke pî Şenyaşar bi şuşeyê serum û sewbîna haletan amebî lînç kerdene.
MA/DÎLOK