Seba ke hayr biancîyo tecrîdê giran yê ser Rayverê Şarê Kurd Abdullah Ocalanî û ci ra hayderî bîro girotiş 50 sîyasetmedaranê kurd 5ê Îlone de Amed de destpa grevê veyşanî kerdî. Pawitoxê Ocalanî ke nûmayişî de ca gênê aşkere kerdî ke dûştê bêhiqûqî heqê xo yê xoverdayişî şixûlnenê. 

Grevê veyşanî yê bê wext û bê açarnayişî ke roja 3. de ya welat û teverê welatî de veng da. Vizêr zî seatanê şodir ra tepya bi seyan kesî şhi ziyaretê nûmayişkaran. Hevsrokê KCD'î Hatîp Dîcle, Hevserokê HDP Fîgen Yuksekdag û Selahattîn Demîrtaş, vatoxê HDK Gulîstan Kiliç Koçyîgît û wekîlê HDP jî, şî ziyaretî. Hemseroka HDP Fîgen Yuksekdag qisey kerd û cewab da vatenanê Wezîrê Edeletê Tirk Bekîr Bozdag ê dereheqê rewşê Ocalan'î de. Yuksekdag va çiyê muhîm vatenê Bozdag'î niyê, ma wazenê Ocalan'î bi çimanê xoya bivînê, ey goşdarî bikirê û rewşê ey fekê ey ra bimûsê. Yuksekdag aşkere kerd ke vatenê wezîrî înan rehet nêkenê. û va hurendîya vatenan raya şiyayinê Îmralî akerê. 

Grevê veyşanî de pawitoxê Ocalan'î Ebrû Gunay û Cengîz Çîçek zî ca genê. Pawitoxê ke 5 serrîyo nêşkenê bi muwekîlê xo ra pêdiyayiş virazê aşkere kerdî ke ê bi hiqûqa bêexlaq yê Tirkîye ra rîbirî mendê. 


Cayo ke qisey û hiqûq qedîya de me 

Pawitoxê Ocalanî Cengîz Çîçek dazonayen ke Grava Îmrali de 18 serrîyo bêhiqûqî dewam kena û zey pawitoxê Ocalanî ê bi hiqûqa bêexlaq yê dewlet ra rîbirî mendê. Çîçekî da zonayen ke sebebê grevî de ca girotişê înan 15ê Temmuze ra na het Ocalanî ra xeber nêgirotiş o û va destûrê Ocalanî ra xebergirotişî nêdayiş raybazê herbê taybetî yo. Cengîz Çîçekî aşkere kerd ke zey pawitoxî ê dûştê bêhiqûqî heqê xo yê xoverdayişî şixûlnenê. 

Çîçekî vist vîrî ke maneya vatişanê Wezîrê Edaletî Bekîr Bozdagî yê ‘Bi eleqedarê weşî û tîvarîya Ocalanî de qe problem çîno’ seba înan çîno û wina va: “Bi na beyanatî wazenê raya pêroyîn manîpule bikerê, la nêşkenê bixapînê. Ma endî cayo ke qisey û hiqûq qedîya de me.”


Bêhiqûqî Îmrali de destpa kena û vila bena

Pawitox Cengîz Çîçekî da zonayen ke heta ke Ocalanî ra xeber bîro girotiş iyê dê nûmayişî de ca bigîrê û va: “Ma jû kiştî ra hiqûqnasîyê, kişta bîn ra zî şoreşger. Ma no exlaqê xoverdayişî zî Rayverîye xo ra girot. Ma no tekoşînê xoverdayişî de hiqûqnasî weçîna. Ma nêşkenê na raştî ra biremê. Ma pawitoxê ke na raştî ra rîbirî ternayişî weçîna yê. Rojanê vernî de ma dê hona bi xoverdayişekê radîkal û girdî xo bivisnê werte. Bêhiqûqî Îmrali de destpa kena û vilayê pêrokîn civakî bena. Dûştê bêhiqûqîya Îmrali de vetiş vervetişê OHAL û dîktaya AKP yo. 


‘Eke problem çînyo çima rewşî niminenê?

Pawitoxê Ocalan'î ya bîn ke grevê veyşanî de ca gêna Ebrû Gunay zî vist vîrî ke no nûmayişê înan çarçoveyê nûmayişê grevê veyşanî yê 2012 yê girotxaneyan de destpa kerdo. Gunay da zonayen ke bi tecrîdî manîkerdişê tebervejyayişê fikrê Ocalanî yeno hedefkerden.  Ebrû Gunay zî hayr ant beyanatanê Wezîrê Edaletî Bekîr Bozdagî ser û persa ‘Eke problem çînyo şima çima rewşî niminenê? kerd. 

Gunay ard ser ziwan ke jew Rayvero ke îradeyê bi mîlyonan o, nêzanime ke grawe de yo, ya zî nê û va: “A şew nêzanime grawe de çi qewimyayo. Pêrokîn hewldayenê ma yê hiqûqî bê netîce mendî. Bi na nûmayişî hewl danime  tecrîdo ke Rayverîye ser o rê bibime cewab. Wazenime wa pawitox, malbat ya zî jew heyet şiro Îmrali û pêdiyayiş virazo. Gunay tewr peynî de veng da CPT ke şiro Îmrali de cipersayişî bikero û hiqûqnasan ra zî vengê wayîrvejyayişê nûmayişê grevê veyşanî û Ocalanî da.   


 DÎHA/AMED