Xeylê bajaranê Kurdistanî û Tirkîya de xebatê weçînayîşî dewam kenî. Endama Koordînasyonê KJKyî Besê Erzîncane derheqê weçînayîşê 24ê Hezîrane de bale ante muhîmîya raydayîşî ser û wina va: “Ganî tevgerê cinîyan, rêxistinê sîvîlî, femînîst, akademîsyen, nuştox, hunermend, elewî û heme hetê bînî şêrî sindoqan ser û raya xo bidî HDP. Çimkî her raya ke nêra dayîş, şona AKP rê.”
Bajaranê Kurdistanî û Tirkîya de xebatê weçînayîşê 24ê Hezîrane bêmabên dewam kenî. Sere de paytextê Kurdistanî Amed de û Şirnex, Mêrdîn, Manîsa, Aydin, Îzmîr, Stenbol û sewbîna xeylê cayan de xebatê weçînayîşî dewam kenî.
Nînan ra bajarê Amedî de lez dîyayo xebatanê weçînayîşî. Bajar de hema vaje her roje buroyê weçînayîşî yê neweyî yenî akerdiş û şar bi coşêko gird beşdarê akerdişan beno. Na çarçewa de Çatrayîrê Mahabadî de buroyê weçînayîşî ame akerdiş û bi hezaran kesî beşdarê akerdişî bîyî. Akerdiş de siloganê ‘Bicuye Rayber Apo’, ‘Bê Rayberî cuye nêbeno’ û ‘Cinî, cuye, azadî’ ameyî eştiş. Namzedê HDPyî yê Amedî Remzîye Tosune, Salîha Aydenîze, Selçuk Mizrakli, Abdurrahîm Aydogmuş û parlamenter Zîya Pîr zî beşdar bîyî.
Namzedan ra Remzîye Tosune va ‘îqtîdarê 16 serran yê AKPyî bajar û keyeyanê ma rijna’ û wina domnaye: “Ê vanî qey kurdî qedîyayî, labelê kurdî nêqedîyayî. Wexto ke ma şîyî sindoqan ser, ganî ma Sûr, Cizîr, Nisêbîn û Cizîr xo vîra nêkerî. Ganî ma goreyê Ekîn Wane, Mehmet Tunç, Cemîle, Dayîka Taybete û Dayîka Fatma cewab bidî înan.” Tosune ra dima parlamenter Zîya Pîrî qisey kerd û qiseykerdişan ra dima akerdişê buroyî ame kerdiş. Tewr peynî şar bi muzîkî govende girewt.
Ganî şarê ma yê Ewropa bi tesilî raya xo bido
Endama Koordînasyonê KJKyî Besê Erzîncane zî derheqê 24ê Hezîrane de meqaleyêk nuşte û meqaleya xo de hişyarîyê muhîmî kerdî. Erzîncane meqaleya xo de vato ‘24ê Hezîrane de do tewr zaf cinî û ciwanê ke azadî û demokrasî wazenî, cewab bidî rejîmê faşîstî’ û wina domnayo: “Her cinîya ke cuya azade wazena, ganî vera îttîfaqê AKP û MHPyî de bixebetîyo. Reyna ganî tevgerê cinîyan, rêxistinê sîvîlî, femînîst, akademîsyen, nuştox, hunermend, elewî û heme hetê bînî şêrî sindoqan ser û raya xo bidî HDP. Çimkî partîya muxalefete ya raştî HDP ya. No semed ra ganî şar seba ke HDP bendê weçînayîşî derbaz bikero, bixebetîyo. Ewropa de raydayîş dest pêkerdo. Ganî şarê ma yê Ewropa bi tesilî raya xo bido. AKP hîleyan keno, cayê sindoqan bedilneno, merdiman tewqîf keno û sewbîna xeylê çîyan keno.”
Ganî cinîyî rayberî bikerî
Erzîncane dewamê meqaleya xo de wina vato: “Ganî cinîyî rayberîya raydayîşî bikerî. Wa cinîyî seba raydayîşê herkesî bixebetyî. Çimkî ganî ma xo vîra nêkerî ke her raya ke nêra dayîş, şona AKPyî rê. Her raya ke şêro AKP rê, vera cinîyan de şîddet û dagîrkerîye zêde benî. Her raya ke şêra AKP rê, yeno manaya zêdebîyayîşê koletîya cinîyan. Rayê HDPyî do dîktatorî bivindarno. Cok ra ma veng danî cinî, ciwan, grûbê bawerîyan, hêzê azadî û demokrasî ke wa seba raydayîşê HDPyî û derbazbîyayîşê HDPyî yê bendê weçînayîşî bixebetyî.”
MERKEZÊ XEBERAN