Nika Kurdistan û Tirkiye de babedo ke en zaf-vêşî meraqê ci yeno kerdin pêvacoya çarekerdinê demokratîk a. Herkes cebawê persa ‘pêvaco qediyayo?’ geyreno. Winî ayseno ke nika pêvaco ebi layê pemû girêdayo. Hikûmet jew firsetê gird yê bîn vinî kena.
Sermiyanê hikûmet nika jû fekî ra hêrişê hereketê serbestî yê Kurd, hêrişê HDP kenê. Erdoğan pîyonê ci Davûtoğlu, Arinç, Akdoğan û yê bînî her firsetî de dişmenî, hêrs û nefret xo verra Kurdan anê ziwan. Nay zî ser HDP kenê. Kiştişê desan kesan ra HDP mesûl gênê û wina bingeyê hêrişan kenê hadre. Xo ra badê hedef damisnayişê sermiyananê hikûmet çormeyê sadîst û faşîstî kewtî hereket. Sermiyananê KCK vistî vîrî ke ‘Gladiyo yê netewî’ dewre de yo. Sebebê no dişmenî çiçîyo ma ebi çend noqteyan biyarê xo vîrî. Hikûmet bi polîtîkayanê qûrnazî, diriyî, xapînayiş damisna ke, zey ke wazena meseleya Kurd hal bikero. La badê wextê derg dî ke nêşenê Öcalan’î û hereketê serbestî biancê xeta xo û teslîm bigîrê fina-reyna destpa hêriş, tehdît, şantaj kerdî. Qandê-rîwalê ke proje, polîtîka û niyetê çarekerdişê meseleya Kurd yê AKP çinyo fina destpa ray û raybazanê leymin yê nêçarekerdin kerd. AKP ya ke vana ma pêvacoyê çarekerdin de bi israriyê, jû serriyo serva-qandê ke Kobanê bikewo çi destê ci ra ame ey kerd. Peycoy dî ke Kobanê nêkewno destpa hemleyê bîn kerd. Pêdiyayişanê bi Rayver Öcalan’î zey şantaj kerd babedê bazarey. La herkes zano ke bê Öcalan’î Tirkiye rê ne haştî, ne demokrasî ne zî weşî yeno.
Ma biyarê xo vîrî; bahdo ke îlanê ‘pêvacoyê çarekerdin’ bi hereketê serbestî yê Kurd xeylê gamî eştî. Zey gama sifte adirbirnayen îlan kerd û peycoy zî gerîlayî vejiyay teberê sînoran. Kişta siyaset de zî Rayver Öcalanî û hereketê Kurd hemleyê ke AKP bivistrê zehmetî nêkerdî. Derbeyê 17’ê Kanûn ya verra AKP zî hereketê serbestî xo rê zey firset nêdî û hêrişê AKP nêkerd. Weçînayişanê şaredarî û reîs-cûmhûrî de zî hereketê Kurd firsetê girdî day AKP. Rixmê nê gaman hikûmet serva ravêrberdişê pêvaco sekerd: Qereqol-Qaleqolê newî viraştî. Tepişteyê nêweşî nêviraday. Mektebanê ke şarî ebi îmkananê xo akerdî girotî. Serva garantîkerdişê heqanê Kurdan hetê qanûnî teba nêkerd, eksê nay rojanê peynî de qanûnê newî yê ke heqanê merdiman binlingkenê vet. Serva ke pêvacoyê diyalog açariyo muzakere jû şertê Rayver Apo’yî zî niyard ca. Serva silametiyê pêvacoyî hikûmet qasê pancas santîmetro zî mesafe nêeşt. Ya zî ma winî vajê; hikûmet jû gam ravêr, didi gamî peyser eşt. Pêrokîn vatiş û siyasetê hikûmet vengiyê-toliyê, zûrriyê bi boçikîniyê.
Erdoğan û AKP Tirkiye winî kirêşnenê jû felaketê da gird ke, ê dê xo binê ci de bimanê. KCK aşkere kerd ke pey hêriş û hewldayinanê înfaz yê verra Kurdan de hikûmet esta û veng da herkesi ke AKP ra hesab perskerê. Jû raştî esta ke şarê Kurd rind zano, eke na qorî-reynî lej destpabikerose kes nêşeno AKP bireyno, bixelesno. Mesele hendayî zelal a. Çi ke ne rojhelatamiyanî de, ne zî dinya de jew dostê dewleta Tirk zî nêmendê. Nika tenya jew dostê tirkiye esto o zî DAIŞ o û o do zî badê wextekê verê xo bido hetê Tirkiye. Zey ke pîlanê ma vatî; “Kesê ke va karenê ê dê firtona biçînê. Çiyo ke wazena vaja; Reynayişê Tirkiye destê Kurdan de yo.