Û kê vînenî otoban de şîyayîş çendê ke asan o. Kê biney baldarî eraba bixebitnî mumkin nîyo qeza bikerî. Hende ke rayîr hîra yo ke panc, şeş erabayî eşkenî têkişt şîrî. Rayîr zaf serûberin o, kê raştê yew çale yan zî xerebe nêyenî. Beno ke sey verênî qezayî nêbenî, zaf merdimî nêmirenî xeyrê nê rayîran o. Nê çîyan ra weşêr nê rayîrî rayîrê transîtî yî. Eke kê bivajî ez di, hîrê seat nêvindira eraba birama yew manî çin o kê bitepişo. Yanî ne qawşak est o kê bivinderno, ne şîyayîşê merdiman est o bivîyarî vera. Bê keyfî vindertiş çin o. Nê rayîrî mesafeyanê şaristanan zaf kirr kerdî.
Ma hende wesfê rayîran da la rexneyê ma çin î? Est î, bê şik est î. Nê rayîran ra şîyayîş belaş nîyo, kê nêeşkenî bê pere bivîyarî. Û nê rayîran de xeylî erabayî vîyarenî û heme tewir erabayî vîyarenî, erabayê qican ra bitepişî heyanê erabayê xişnan heme tewir erabayî nê rayîran de şonî yenî. Hema hema ma bivajî ke heme erabayî nê rayîran xebitnenî. Dewlete seba nê rayîran zaf pere zeynena.
Çend serran de mesrefê nê rayîran vejena û dest bi karkerdişî kena. Senî ke dewlete gaza xozaye û elekrîkî ra pere zeynena nê rayîran ra zî pere zeynena, wina tay nê, zaf zaf zeynena. Nê rayîrî çirê rojhelatî de çin î? Eke pereyîn o wa pereyîn bo, îtîrazê ma çin o. Çirê hende serrî vîyartî hema zî rojhelatî de nê rayîran nêvirazenî?
Çirê erdvînayîya kurdan de nê rayîran nêvirazenî? Seba ke nê şaristanî raya xo nêdanî îqtîdaran nê rayîrî nêvirazîyenî? Rayîrê otobanî Amedî de dest bide nêkeno Riha de dest bide keno. Û nê çend serrî beno ke vanî ha emser ha serna rayîrê otobanî reseno Amed. La çend serrî vîyart çî nêbedilîya. Hema zî şarê Amedî paweno ke rayîrê înan zî bivirazîyo. Kê Mersînî ra heyanê Rihaye yenî kê nêzanenî senî ameyî. La kê senî dekewenî rayîrê Amedî kê xo şaş kenî.
Seba ke kê asaneyî reyde heyanê Rihaye eraba xebitnaya, dima rayîrê Amedî de eraba xebitnayîş zaf zor yeno. Rayîrê Amedî di şerîtî ra virazîyayo la kê heyanê Riha yenî heme cayê rayîrî de ya xebata rayîrê est a yan zî rayîr xerebe yo ganî kê fesal şîrî. Cêk ma dîyo nê rayîrî de tim xebat est a. Semedo ke rayîrî weş nêvirazenî tim xerebe beno. No zî şarî aciz keno. Ê, rayîran nêriz/sexlem bivirazî nê rayîrî çend serrî na hawa nêriz bivinderî. La se kenî? Seba ke merdimê înan rantê nê gureyan biwerî nê rayîran ser ro şonî. Çi beno zî şarî rê beno û şarî eciz kenî.
Nê rayîrê gerek hetê ma de bivirazîyî, heyanê peynîya rojhelatî bivirazîyî. Eke şaristanî rayîran ra kifş beno, nê rayîrî ca de tîya de zî bivirazîyî. Rojawan zî hemwelatîya na dewlete yo, rojhelat zî hemwelatîya na dewlete yo. Rojawan zî bac dano, rojhelat zî bac dano. Ferqê ma yo rojawanî çin o, o wext çi xîzmet rojawanî rê est o ma rê zî yanî rojhelatî rê zî ganî bibo. Heme hetî ra seyyewbînaneyî biba.
Rayîrê otobanî yew numune bi, sey rayîrê otobanî çi kêmanîya rojhelatî est a ganî pêro wedarîya. Birayî û hemwelatî encax na hawa biba.
Zerweş ESNAW