Endama Konseya Ravverîya KCK`e Fatma Adir qiseyanê xo bi vîrardişê hîrê cenîyanê şoreşger destpa kerd û vist vîrî ke ser qetilkerdişê Sakîne Cansiz, Fîdan Dogan û Leyla Şaylemez ra çar serrî vêrdî ra. 

Adir aşkere kerd ke iyê dê heta peynî rayîra înar de şirê û hina dewam kerd: “ Embaz Sakîne dema ke ez hona doman bî zerreyê tekoşînî de cayê xo grewtbi. Behs kerdî vatî xarpêt de îşkenceyê giranî dî. Dismen besenêkerdo dara qesê bijero. Her tim qalê Sakînê estbî, reyê xo ra her tim sereyê ci berz bi. Cenîya rayê xo ra ranecena, vatênê ser raya Seyîd Riza ra sona.”

Sakîne rayê Besê û Zarîfe ra şî

Adir da zonayen ke dima ra wexto ke bî pîl waşt Sakîne Cansiz nas bikero, nayî ra şî zîndanê Amedî. Fatma Adir vist vîrî ke Sakîne seba înan xeyal bî û va, şexse embaz Sakîne de efsane bi raşt. 

Endama Konseya Ravverîya KCK`e Fatma Adir hayr ant Qirkerdişê Dersim ser û qiseyanê xo bi nê vatenan ramite: “Tertelê 37-38 de vatê  tertelê de cenîkê bi namê Besê estibî, Zarîfe estibî, cenîkê zof xort bî, embaz Sakîne rayê dine ramena. Dima ez amêya partî, a kî zîndan ra vejîya.”

‘Kesî ra meterse’


 Adir behsê kesayeta Cansiz kerd û bi nê vatenan ayî tarîf kerd: “Wexta ke vanê Sakîne kama? cenîka ke sereyê xo vernîya kesî de çewt nîkena yena vîrê ma. Verva malbatî, verva serdestîya camêrdan de vineta, verva dismen de vineta. Cenîyeka hin bi. Ma pîya zerreyê tekoşîn de xover da. Vatênê  ‘kesî ra meterse pêro ca de qiseyanê xo vaze’ ‘cuyayişe aye tim ceng bi`. Miyanê partîyê de ma zof heskerdêne, zerreyê ci û teverê ci juvî bi. Qiseyê ci û kerdişe ci juvî bi.”

Fatma Adir da zonayen ke Dersim de asîmîlasyon û tertelê Kemalîzm virazîyabi. Netîceyê na polîtîka tayî kesî bîbî asîmîle û eslê xo ra dûr kewtbî. La alwoz Sakîne û alwozê ci bi pakî Dersim de mendî û xo seveknayî. 

Sereyê ma berz o

Adir da zonayen ke Cansiz heta peynî bi heskerdişê Dersim û welatê xo ra girêdayî mend û hina dewam kerd: “Aye wast ke heyfê  tertelê 37-38  bijero, heta 9ê Çile qirkerdişa Paris sereyê ci de îdiayê xo estbî. Cenîya ke ser îdiayanê xo şîya, ewja de şehîd bî. Zerrîya ma zaf dejîya, la bi tekoşîna înan sereyê ma berz o. Xebera şehadeta ayî zimistan de resya ma. Vernî de ma va rast nîyo, ma va dismen nêşkeno bireso alwoz Sakîne. Rîwalê xebera şehadetê ci zerrîya ma qorfîya. Alwozeke hina tekoşer ganî nîro xovîrra kerdiş.”

Endama Konseya Ravverîya KCK`e Fatma Adir da zonayen ke Sakîne Cansiz mîraseko zaf girs pey de verda û aşkere kerd ke iye dê wayîrê no mîrasî bivejyê. 

Adir veng da malbat, şarê Dersim, alwozê Cansiz û pêrokîn şarê Kurd ke tekoşîna Sakîne Cansiz wayîr bivejyê û bi nê vatenan qiseyanê xo qedêna: “Sereyê ma berz o û ganî ma rayîrê aye biramê. A tornê Seyît Riza bî, torna Besê û Zarîfe bî, rayîrê înan ra şî û wayîr vejîya. Gune ma kî wayîrê ayî bivejyê. Sey mîrasê ayî ma welatê xo ra wayîr bivejyî. Ma kitabê ayî xo rê zey wesîyet bicerê, zonê xo, welatê xo, erjayenanê xo, xo vîr ra mekerê. Îtiqatê xo yê alewitî wayîr bivejime. Tertelê 37-38 xo vîr ra mekerime, kam ke xo vîr ra bikero  o cax embaz Sakîne xo vîr ra keno, xo zî xo vîr ra keno. Ganî ma her roj alwoz Sakîne bîyarime vîra xo.”


ASMEN ADIR / BEHDÎNAN