Rayverîye hedefê konseptê herbî de yo

Koordînasyonê Komalên Jinên Kurdistanê (KJK) vist vîrî ke pêrokîn hewldayenê çarekerdişê meseleya kurd yê Ocalanî û Hereketê Serbestî hetê dewleta tirk bê cewab mendê û sîyaseta îmha û înkarî de yeno israr kerden. KJK da zonayen ke bi kerdenanê qirkerdenê sîyasî, kulturî û fizîkî dûştê şarê kurd û Hereketê Serbestî de êrişê topyekûn yenê ramiten. Damûstayîn de hayr ancîya projeyanê demokratîk yê çarekerdişî yê Ocalanî ser û vajîya ke nê hewldayenê seba haştî û demokrasî Tirkîye de raştê reaksîyonê rind yê çormeyanê çep, sosyalîst, demokratîk, nuştox, roşnbîr, cenî û gencan yenê. 
Koordînasyonî da zonayen ke dîktatorîya Erdoganî nê hewldayenan seba xo zey taloke vîna û wina dewam kerd: “Demokratîkbîyenî û çarekerdişê meseleya kurd ver rejîma xo ya dîkta de zey manîyeke dî. Nayî ra weçînayişanê 7ê Hezîranî ra dima derbeya sîyasî viraşt û dûştê hereketê ma û pêro quwetanê demokrasî konseptê îmha vist dewre. No çarçove de Erdoganî Mutabeqatê Dolmabahçe çinî hesibna, 5ê Nîsan ra tepya pêdiyayinê bi Rayverîye ma birna, vera şarê ma yê Bakûr û Rojawa êrişanê xo kerd berz. Bi aktuelkerdişê sîyaseta antî-kurd,  seba tesfîyekerdişê Şoreşa Rojawa îtifaqê qilêrîn yeno ramiten, wazîyeno vernîya statuyê sîyasî yê Rojawa bîro giroten.”

Tekoşînê statuyê sîyasî

Damûstayîn de vistîya vîrî ke şarê kurd tekoşînê statuyê sîyasî dana û haştîya Rojhelatê Mîyanî ra rayverîn kena û va: “Rayverîye ma mîmarê nê serkewtişano. Projeyê netewa demokratîk û xoserîya demokratîk ke Rojhelatê Mîyanî de roj bi roj hona jêde yena qebûl vînayen menfeatanê hegemonîk yê quwetanê Tirkîye û Rojhelatê Mîyanî xerpnena. Nayî ra quwetê komploger yê mavên netewî û netew dewletê heremî seba ke Rayverîye ma teberê pêvacoyî de bigîrê pêkerdîyê. Na îtifaqa qilêrîn wertexbîyayişê êrişanê topyekun yê Rayverîye ma û şarê ma yo.”
KJK vist vîrî ke Navendê konseptê îmhayê topyekunî de Ocalan esto û da zonayen ke îxtidara faşîstîn ya AKP pêrokîn hiqûqa mavên netewî binling kena, heqanê însanî çinî hesibnena û Ocalanî rê mûameleyê rehîneyî kena. KJK hayr ant bîyayişanê 15ê Temmuze û pey ci ser û aşkere kerd ke ser Ocalanî de tehdîdeke gird esto. KJK va îxtidara AKP bi no tewrê xo Tirkîye kirêşnena mîyanê herbî û topa adirîn bi destanê xo virazena. 

24 seat her ca de seferberî

Komalên Jinên Kurdistanê aşkere kerd ke nika bi hemleya êrişanê newî yê Komployê Mavên netewî ra rî bi rî yê û wina va: “Binvistişê na hemle encex çorme girotişê Rayverîye de bi radîkalkerdişê tekoşînî mimkûn o.  Nayî ra heta Rayverîye ra xeber girotiş û pê ra viraştişê pêdiyayinî ganî şarê ma her ca de 24 seat seferber bibo û nûmayişanê radîkalî virazo.”

Dûştê faşîzmî nûmayişî

KJK waşt ke seba Rayverê Şarê Kurd Abdullah Ocalanî nûmayişî berz bibê û bi nê vatenan veng da cenî û gencan: “Rîwalê nûmayişanê heta nika ma şarê xo selamî kenê. La hewcedarîyê nûmayişanê radîkal û hera esto. Bi no şiklî ma êşkenê tecrîdê ser Rayverîye xo wedarnê. Nayî ra ganî metropolan de cenî û gencî nûmayişan rê rayverîn bikerê. Ganî bi şîyara “Bê Serok cuyayiş nêbeno” bi rihê xoverdayişê netewî û seferberî heta ke Rayverîye reyde pêdiyayin virazîyo hewtî ra heta hewtayî pêrokîn şarê ma seferber bibo.”