Bêrîvanê ke her serre aşma wisarî de vejîyenî zozanan û 6 aşmî zozanan de manenî, emser zî seba dotişê şitî kewtî rayîr. Bêrîvanê ke dewa Roboskê ya qezaya Qilebanî ya Şirnexî de cuyenî, aşmêk o ke seba dotişê şitî şonî û yenî.
Bêrîvanî rojêk de 2 reyî mêşnayan doşenî û mabênê nan û çayî de yenî têhet û sohbet kenî. Bêrîvanî şito ke doşenî pê penîr, mast, rûno kele û sewbîna virazenî. Bêrîvanan ra Naîme Encuye va ‘aşmêk o ma şonî û yenî’ û wina domnaye: “Ma bi traktorî şonî û yenî. Hema vaje heywanê herkesî estî. Ma werdê xo zî tîya de wenî. Ma payîz de nizdîyê dewe de bêrîvanîye kenî.”
Hacîra Encuye zî wina va: “Ma şito ke doşenî reyde debara xo kenî. Her roje qasê lazimîya ma şit vejîyeno. Ma bîdonanê xo pirr kenî û şandan zî nê şitî girênenî. Ma penîr, mast û sewbîna virazenî. Ma danî merdimanê xo û yê zêde zî bazar de roşenî.”
No anane do dewam bikero
Ayşe Encuye zî va ‘ma nê karî ra kêfweş benî’ û wina dewam kerde: “Ma dayîkanê xo ra musayî û ma nîşanê yê ke ma ra dima yenî zî danî. Ma betilîyenî labelê ma memnun î. Domanê ma saya nê heywanan de pîl benî û ma debara xo wina kenî.”
JINNEWS / ŞIRNEX