Esqê sîyasetvananê tirkî û eskeranê xo qeyta nêqedîya.
Çîller waxtê xo de verê serokfermandarî Dogan Gureş de bîyenê çewt.
Çîller qetilkaran û çetan rê wayîr vejîyenê, vatenê ‘kamo ke seweta welatî qersune erzeno û qersune ginena ro ci, qehreman o.’
Nika kî Erdogan jê Tansu Çîllerî keno.
Hata Erdogan Çîller ra jede eskeranê xora haskeno.
No esqo qilêrîn tertelê Roboskî de homete rê hebena bî zelal.
Erdoganî rîwalê tertelê Roboskî ra leborîne nêwaste, eskerê xo kerdî bimbarek û cirê berxûdarîye waste.
Erdogan hete ra vano ‘qeyta jû dewlete qomê xo bomba nêkena’ hete ra rîwalê qetil kerdena 35 kurdan ra fermandaranê xorê berxûdarîya vano.
Ma kurdan ra naye vano ‘merdena sima, çitur bena bibo, bîrûbazarê mi de nîya.’
Hukumat û dewleta AKaPe hem qetilkar Ataturk ra hem kî qetilkare Tansu Çîller ra zaferî qetilkar yê.
Ataturk û Çîllerî estbîyayena kurdan qeyta qebul nêkerdenê û tertele kerdenê
AKaPe estbîyayena kurdan qebul kena, hen kisena. Na semed ra kî pêroyîne ra zaferî qetilkar a.
Na derheq de Mistê Korî û maya çetan Çîller cevê xora vezena.
Peynîya perskerdîsê tertelê Roboskî seweta ma nika ra zelal a.
Qerar gureto perskerdîs dizdîya, nimite virazenê.
Na yena çi mane!?
Hukumat, eskerîye û rêxistinê îstîxbaratî xo qilêrê juvînî de şunê, bi na tore xo kenê pak.
Sîstema faşîstan û dîktatoran her tim nîya ra. Homete ra dûrî, tolde de û bêmuxalefet pêro guna xo erzenê kesê bînî ser.
Peynîya perskerdîşî mara rewra vate: ‘Tertele de qest çîno’
Endî çi doskarîye, çi cigeyrayene, çi perskerdîs. Manê xo çîno.
Cila qilêrine de esqo qilêrin.
Hukumat qilêrin.
Dewlete qilêrin.
Eskerîye qilêrin.
Serokfermandar qilêrin.
Serokwezîr qilêrin.
Serokkomar qilêrin.
Esqode kîmayasal û qilêrin mavênê Recep û Necdetî de.
Honde qilêrîye ra pakîye nîna pîtene.