Do 25ê êlule de Kurdistanê Başûrî de seba xoserbîyayîşî referandumê bibo. Nê referandumî de îmkanê amayo şarê ma ver. Do yan xoserîya Kurdistanê Başûrî rê vajo “e” yan zî vajo “ney”. Nê aşmanê peyênan de hem kurdan mîyan de hem zî teberê kurdan de nê referandumî ser o zaf munaqeşeyî benê. Ke ez qisaya xo ya peyêne vernî de vaja, ke nê referandumî de reyênda mi bibîyayê, mi do xoserîya Kurdistanî rê bivatê “e”. Çi rê?
Xeylê argumentê mi estê. Labelê ke ez argumentanê xo di xalan de bîyara pêser, argumentê min yo yewin; xoserîya Kurdistanî heqê kurdan a û nê meseleyî ser o qerardayîş zî heqê kurdan yê zaf xozayî yo. Dîyin, ke dişmenê kurdan çîyê rê hende neyarîye û dişmenîye bikerê, ganî ma bizanê ke o çî seba ma kurdan zaf baş o. Coka ez vana “e”.
Zafêrê kurdan do nê referandumî de seba xoserîya Kurdistanî vajê “e”. Labelê yê ke do vajê “ney” zî kêmî nîyê. Ê zî çend tewir ê: Înan ra grûbê, ê kurdê ke menfaetê ci bi dewletanê ke welatê ma îşgal kerdê ya esto yê. Nê seba menfaetê xo û dişmenanê ma vanê “ney”. Grûba dîyine, tayê partî û grûbê sîyasîyê ke partî û grûbanê sîyasîyanê Kurdistanê Başûrî yê ke serdest ê û xoserîye wazenê ra hes nêkenê, seke înan rê reaksîyon bo, xoserîye nêwazenê. Grûbê zî vana “xoserîye mafê kurdan a, labelê wextê ci nîyo, tayê partîyê başûrî wazenê bala şarî persenê xomîyanîyan yê ekonomî û sîyasîyan ra dûrî fînê nê referandumî xebitnenî.” Grûbê zî kurdê şarê başûrî yê. Na grûbe grûba tewr gird a. Na grûbe zî vana “ma kişta ekonomî û sîyasî ra krîz de yê. Ma vêşan û têşan ê, meaşê karker û karmendan kêmî kerdê, heme çî bîyo vay. Bawerîya ma partîyanê ke serdest ê ya çin a. Nê wazenê referandumî seba menfaetê xo û merdimanê xo bigurênê.”
Ez hamnanî Kurdistanê Başûrî de bîya. Mi na grûbe ra çend kesan a qisey kerdî. Şaro ke teberê PDK de yo rewşê ekonomî ra zaf gazincî keno. Demeyo ke gazincî keno zî, tayn merdimê ke kişta PDK gînê, înan bi hetkarîya “Goran”, “PKK”, “Îran”îya bîyayîş a sucdar kenê. Seke mi cor de zî va, na grûbê zaf gird a. Argumentê înan ca de yê. Ti çend vajê hende bi heq ê. Mi gore grûba ke bi awayêndo samîmî referandumî rê vana “ney”, na grûb a. Û partîyê ke serdestî zî nêşenê cewabêdo maqûl bidê talebanê na grûbe.
Grûba ke tewr vêşî û bi awayêndo dişmenane hemverê referandumî vejîyêna Tirkîya, Îran û tayê welatê ereban ê. Nê zî eşkera dişmenîya kurdan kenê û wazenê kurdî tim înan destan bin de bî. Nînan ra tayê winî ravey şî ke, va “referendum do ma rê bibo sedemê şerî.” Bi taybetî Tirkîya, dîplomasîya xo na mesela ser o konsentre kerda. Kiştê ra Tehran û Bexdadî ya qisey kena, kişta bîne ra bi Amerîka û bi weletanê bînan a qisey kena û kişta bîne ra zî PDK û YEKITÎ ser o zixt (tehda) ronana ke referandumî îptal bikerê, ke îptal nêbo zî wa texîr bo. Seba na perse wezîrê Tirkîya yê teberî Çawişoglu 23ê tebaxe de verî şî Bexdad ke bi Îbrahîm Caferî ya persa xo yew kerê, dima zî şi Hewlêr ke PDK tehdît bikerê. Heman roje Erdoganî Anqara de wezîrê teberî yê Amerîka qebul kerd û nê meseleyî ser o qisey kerd. Amerîka nêva referandumî îptal bikerê, labelê va texîr bikerê.
Tayê kurdê parçeyanî bînan zî vanê “no referandum tena seba Kurdistanê Başûrî yo. Coka raşt nîyo.” Mi gore, ke seba yew dewa Kurdistanî bo zî ganî ma vajê “e”.
Mi gore persê mîyanê kurdan çiçî benê wa bibê, kamcîn partî referandumî ra çiçî pawena wa bipawo, no mesele, meseleyê partî yan grûban nîyo. No meselayêde neteweyî yo. Seba xoserîya Kurdistanî tespîtkerdişê meylê kurdan zaf girîng o. Coka ez vana "e".