Tirkîya de seba ke dîktatorîya kesêk bêro awankerdiş referandûm yeno viraştiş û nika ra îqtîdarê AKP û MHPyî şarî ser de zext û zordarîyanê girdan meşnenî. No proses de CHP mîsyonê xo yê muxalîfî nêano ca û HDP zî bi tewqîfkerdiş û tepiştişan reyde xebatê ci ameyî vindarnayîş.
Heto bîn ra her çiqas ke referandûm seba Serekîya Erdoganî yeno viraştiş zî mîyanê AKPyî de kesê ke nêyî ra eciz î, estî û yeno vatiş ke do referandûmî ra dima nê kesî bêrî têhet û partîyêka newe awan bikerî.Keyepelê Lekolîn.orgî ra goreyê xebera Dilgeş Yerlîkayayî nê kesê ke na dîktatorîya kesêk ra eciz î, do referandûmî ra dima bêrî têhet û bi hawayo fermî partîyêka cîya awan bikerî. Mîyanê nê kesan de kesê sey Abdullah Gul, Mehmet Şîmşek, Alî Babacan, Sadullah Ergîn, Bulent Arinç, Huseyîn Çelîk û sewbîna xeylê kesî do mîyanê na partîye de ca bigirî.
136 Parlementerî
Reyna goreyê eynî çimeyî grûba ke vera dîktatorîya Erdoganî de bireaksîyon î, yeno vatiş ke hûmara nê kesan xeylê zêde yo. Mîyanê nê kesan de 136 kesê ke nika parlamenter î zî estî.
NAVENDÊ XEBERAN