Tecrîd, bi vatişê bîn îzolasyon tenyakerdiş o. Bi na ray keso ke yeno tecrîd kerdin eleqeyê ci pêrokîn dinya ra birniyeno. Tecrîd tewr vêşî zey raybazê herbî yeno şixûlnayin. Zindanê tîpê F zî serva-qandê tecrîdê giran verra tepişteyan biramnê viraziyayê.
Tirkiye de girotxaneyo tewr giron tecrîd yeno ramiten Îmrali yo. Çi ke girotxaneyê Îmrali behr-zerya miyan de, jû giravî de viraziyayo û çormeyê ci pêrokîn aw o. Rayverê şarê Kurd Abdullah Ocalan 17 serriyo na girava ke bi dinya ra eleqeyê ci birniyayî ra de bin îşkence de yeno giroten. Dewleta zilimkar ke xo bi nay nêgirot panc serriyo tecrîdî miyan de tecrîd ramena. Pawitoxê Ocalan’î 2011’î ra heta na het nêşenê şirê muwekîlê xo het. Dewleta Tirk çiwext ke verra hereketê serbestî de kewna zehmetiyan miyan polîtîkayê şantajî vistnena dewre û tecrîdo ser Ocalan’î tewr vêşî kena giran. Heyetê HDP yê Îmrali zî 5’ê Nîsan ran a het nêşkenê şirê Îmrali. Nayî ra pêvacoyê çarekerdin ravêr nêşno.
Hikûmet bi tecrîdî çi kena hedef?
Verra netîceyanê weçînayinî hikûmet kewt zehmetiyan miyan. Herzewbîn polîtîkayê şaş yê verra Rojawa deşîfre bî. Dewlet him herem de, him zî qadê mavênnetewî de prestîj kerd vinî û tenya mend. Hikûmeta ke her hetî ra kewta tengî miyan wazena bi hamleya newî na tengî ra bivejyo. Nika hereketê serbestî ra wazena ke bê şêrt tifingan virado. Serva-qandê ke Ocalan nê şertanê ci qebûl nêkeno yeno tecrîd kerdin. Serwezîrê Tirkiye Davûtoğlu’yî bi fek dê xo îtiraf kerd ke ‘E ke tifingî nîrê viradayin hewceyê pêdiyayişan zî çinyo’! Bi nê polîtîkayanê şaş dewleta tirk him hiqûqa xo, him zî ya mavênnetewî binling kena. Çi ke çiyê ke Rayver Ocalan’î rê yenê ferz kerdin hiqûqî niyê, siyasî yê.
Bi nê hesaban hikûmet fina-reyna hemleyê şaş kena. Çi ke Ocalan Rayverê jû şarî yo. Muameleyê verra Ocalan’î, muameleyê verra pêrokîn şarê Kurd, verra pêrokîn merdimî yo. Nayî ra AKP bi adir kaykena. Herzewbîn bi nê kerdinan dewlet verra meseleya Kurd de niyetê xo zî beyan kena. Nê kerdinê hikûmet herbî tehrîk kenê. Xo ra waştena ci zî na ya. Hikûmet wazena ke hereketê serbestî bianco lejê newî miyan.
Verra nê polîtîkayanê tehrîkkerdin hêrsê şarê Kurd zî roj bi roj beno vêşî. Şarê Kurd tenya waştena hewadayinê tecrîd nêkeno, wazeno ke Rayverê ci serbest bîro viradayin. Raştî zî verra hikûmeta AKP de tenya jew çî mendo, o zî serbestviradayişê Ocalan’î yo. E ke wina bikero AKP şena bîrê tarî ra bivejyo. Hamleyê zewbînî dê Tirkiye biancê kaosê do xorînî miyanî. Dîrok şahîdo ke şarê Kurd şeno serva-qandê Rayverê xo se bikero.
Hindî welişnayişê sîstemê Îmrali ame. Qanûnê rejîma Îmrali rewna ra verra Ocalan’î îflas kerdî. Nay de israrkerdiş do tenya kêberê verra herbî akero. Gune dewlet endî raştiya Ocalan’î qebûl bikero û azadiya ci biyaro ca.