Rayberê Şarê Kurd Abdullah Ocalan 27ê temmuza 2011î ra nata nêşêno avûkatanê xo reyde pêvînayîş bikero. Ti cayê dinya de nimûneyê tecrîdê winasî ne ameyo dîyayîş, ne zî ameyo eşnawitiş. 

Babete ser o avûkatê Buroyê Huqûqî yê Asrinî ra Cengîz Yureklî û Ozgur Erolî qisey kerdî û derheqê tecrîdo ke 15ê sibata 1999î ra nata yeno domnayîş ser o vînayîşê xo ardî ziwan. 

Yureklîyî va ‘Ewro Tirkîya de mefhûmê tecrîdî Ocalanî reyde bîyo yewe’ û wina dewam kerd: “Çîyo ke Îmrali de yeno cuyayîş, tecrîdî derbaz kerdo. Herçiqas ke hende neheqîyî estî, muracatê ke ma dezgehanê mîyanneteweyîyan rê kerdî, bênetîce mendî. Wexto ke babete bena Ocalan, hem huqûqê Tirkîya û hem zî yê Ewropa nêerzîyenî dewre.”


99 ra nata ma rapor erşawenî 

Yureklîyî dewamê qiseykerdişê xo de va ‘ê serra 99î ra nata bi hawayo sîstematîk rapor erşawenî CPT, labelê CPT babete ser o bêeleqe maneno’ û wina domna: “Muracatê ma yo peyên de ma 15 aşmî yo ke qet xebere nêgênî ser o bî. Ganî CPT Îmrali zîyaret bikero û rayapêroyî xeberdar bikero. Labelê CPT yan nêşî Îmrali yan zî wexto ke şî zî rayapêroyî xeberdar nêkerd. Huqûq de goreyê kesî nîzam nêbeno. Cok ra merdim nêşêno Îmrali tena sey zîndanêk şinase bikero. Çimkî Îmrali nameyê sîstemê bêhuqûqîye yo.”


CPTyî muhîmîya rewşe fam nêkerdo

Avûkat Erolî zî wina va: “Ez bawer nêkena ke şîyayîşê CPTyî yê Îmrali girêdayeyê destûra Tirkîya yo. Çimkî prosedurêkê yê CPTyî esto. Cok ra CPT kamcîn wext bêro Tirkîya eşkeno şêro Îmrali. Vernîya nêyî de ti astengî çin o. Labelê CPT nêşono Îmrali. Sebebê nêyî huqûqê heqê merdiman yê Ewropa yo. CPTyî muhîmîya şîyayîşî fam nêkerdo. CPT 2016 de Îmrali zîyaret kerd, dima ra 2 reyî ame Tirkîya, labelê nêşî Îmrali û no derheq de melumatêk nêda ma.”

 Erolî dewamê qiseykerdişê xo de dîyar kerd ke ganî mesele bi hawayo raşt bêro famkerdiş û wina va: “Wazeno wa bêro ecibnayîş yan zî nêro ecibnayîş, huqûqo modern tayê usûlan ser o aver şî. Nê usûlî zî seba ke tayê cigêrayîşî hîna bi hawayo pispor bêrî kerdiş ronîyayî. Sebebo dîyin zî seba ke heqê kesê ke yenî mehkemekerdiş, cezakerdiş û sewbîna bigîrî binê temînatî yo. 800 serrî yo ke rejîmê usûlî ke amebî awankerdiş, Girawa Îmrali de ame wedarnayîş. Nika zîndano ke nîşanê avûkatan nîno kerdiş, zîndano ke nîşanê keyeyî nîno kerdiş esto. Cok ra qebulkerdişê nê sîstemî, qebulkerdişê bêhuqûqîye yo.”

Heto bîn ra vizêr 250 avûkatî seba ke Rayberê Şarê Kurd Abdullah Ocalanî reyde pêvînayîş bikerî muracatê Serdozgerîya Komare ya Bursa kerdî. Seke yeno zanayîş waştişê pêvînayîşî yê avûkatan bi mehneyê ‘keştî xira be ya’ û ‘rewşa hewayî baş nîya’ 706 reyan ameybî qedexekerdiş. 


MERKEZÊ XEBERAN