Parlementerê HDP Nadîr Yildirim ke derheqê referandûmî de qisey kerd vist vîrî ke rîwalo ke Erdoganî Mutabeqata Dolmabahçe red kerd, welat kewt mîyanê krîzekê pîlî û va, ma dê soza xo ya ‘Ma dê to nêkerê Serok’ bîyarê ca.
Hikûmeta AKP û Erdogan hewl danê ke krîzî mîyan de rejîma yew kesî înşa bikerê. Seba nayî hadreyînê referandûmo ke aşma Nîsan de virazîyeno kenê. Yardimkarê Hemserokanê HDP Nadîr Yildirimî na babed ANF rê qisey kerd.
Yildirimî hayr ant weçîntayişanê 7’ê Hezîran ser û aşkere kerd ke HDP hukmê 13 serran yê AKP werte ra wedarna. Nadîr Yildirimî aşkere kerd ke 7’ê Hezîran serkewtişê sîyaseta demokratîk bi û wina dewam kerd: “AKP rîwalo ke reyna bîn bi tenya serê xo bibo serdest, bi raya şer (lej) û kaosî weçînitoxan tehdîd kerd û 1ê Mijdarî de welat reyna berd weçînayîşî. No zî damûsneno ke AKP çarçoveyê partîya sîyasî ra vejyaya. Hemverê ma de partîyeke ke bi şerî ser payan de vindena, esta.”
Pêşnîyazê yew şexsî
Yildirimî îşaretê pêşnîyazê bedilnayîşê qanûno bingeyînî ke meclîs de amê qebûlkerdiş kerd û va, ‘na yew pêşnîyazê seba sîstemî nîya, yê ‘yew şexsî’ ya. Parlementer Yildirimî vist vîrî ke mîyanê na sîstemî de kontrol çîn o, wezîfeyê qanûndayişî, rayberî û dadgerî her çî bi şexsekî girê dano û va, “Tîya ra demokrasî nêvejîna. No yew tesfîyekerdişê demokrasî yo. Ma bawer kenê ke referandûmî de na pêşnîyaz nîro qebûlkerdiş.”
Ma vernîya Erdoganî girot
Yardimkarê Hemserokanê HDP Nadîr Yildirimî kampanyaya ‘Ma dê to nêkerê Serok’ ya wextê weçînayişanê 7’ê Hezîranî vist vîrî û va, ma dê na soza xo bîyarê ca. Yildirimî aşkere kerd ke nika zî bi destê MHP rejîma yew şexsî pêşkêşî AKP kerdîya û qiseyanê xo bi nê vatişan domna: “7’ê Hezîranî û 1’ê Mijdarî de ma vernîya Erdoganî girot. Nika zî ma şenê vernîya ci bigîrê. Bi xoverdayîşeke demokratîk ma êşkenê vernîya ci bigîrê. Ma dê goreyê na yewî stratejîyeke bidê ramiten.”
Yildirimî herzewbîn hayr ant ser krîza ekonomî ser zî û va: “Eke qerarê ’NÊ’ referandûmî ra bivejyo, do rewşê ekonomî rind bibo. La eke “E” referandûmî ra bivejyo do krîzê ekomonî hona xorîn bibo.
OMER ÎKE / ANF / WAN