HAMDÎYE ÇÎFTÇÎ / JINNEWS / COLEMÊRG
Bi ameyîşê wisarî herra Mezopotamya ke meymandarîya bi hezaran tewir vilike û gandaran kena, bena rengin û hêvîya merdimî gandar kena. Seke yeno zanayene vilikî hem dermanê xeylê nêweşîyan î, hem bi boy û rengê xo şaîr û resimviraştoxan rê benî çime û hem zî xeylê hîkaye û estanikan de benî sembole dej, kêfweşî û sewbîna.
Herra Mezopotamya de vilikî bi ameyîşê wisarî benî nameyê rindîya ke qet nimuneyê ci çin o. Vilikî tebîeto ke zimistanî ra dime newe ra gandar beno de rengnenî. Vilikê ke xusûsen herêma Colemêrg de vejîyenî, ko, zinar û kerrayan qileşnenî û xo resnenî zerqê tîje. Vilikê ke renganê mor, sûre, zerd û keske gênî, boyêka weşe danî.